Hamilton-i Mexican Grand Prix takok marok agizükogo

Mexico City, October 31 (Agencies): Defending champion, Lewis Hamilton-i tekaraba mapang nung alizüng tonga, Mexican Grand Prix (GP) Formula One (F1) takok marok yashi, Deobar nü agizükogo.
Britain nunger Hamilton-i F1 championships nung temaba jenjang abener aser külem Mercedes telok gari toktepa anishir, Germany nunger Nico Rosberg den tekaraba mapang nung alizüng tonga, tan takokbaji angu.
Arishi küm 31 tain Hamilton-i tan takok anguba sülen points 19 tashi ajangzükogo.
Hamilton aser Rosberg na sülen anidaka, Red Bull telok gari anishir, Australia nunger Daniel Ricciardo-i yashi tetoktepba nung tasembuba jenjang ngua liasü.
Tan takok anguba ya Hamilton-i tan agi tanabuba takokba atonga akokba den taküm 2016 küm tenzüker tanü tashi nung 8 buba aser gari toktepa anishitsü tenzüker tanü tashi nung 51 buba takokba ajangzüker lir.
“Ni tan mezüngsüa Mexico nung takok angur lir aser iba atema kanga pelar,” ta Hamilton-i tesülen metetdaktsü.
Ano, tan Hamilton aser Rosberg nati 1 buba aser 2 buba jenjang anguba ya par Mercedes teloki taküm küm tenzüker tanü tashi nung 1 buba aser 2 buba jenjang tan agi 17 ben buba tashi ajangzüker lir.