Hamza Bin Laden tepsetoko: US media

Washington, Luroi/August 01 (Agencies): Al-Qaeda tenzüksang Osama Bin Laden’er jabaso Hamza Bin Laden ya tayimtsü amshia amakdang tepsetogo, ta itdangiter ketdangsertemi ashiba US media balala ajanga sangdong.
Pa asüba tesem aser anogo ya mejangja aser Pentagon-ia osang mesangdongi lir.
Hamza Bin Laden ya arishi küm 30 shi asütsü ta amanger, aser pai audio aser video message tem sayaba nung US aser tanga linüktem amaktsü shia lir.
Pa aputsü asoshi osang tejangja agütsütetra sen million $1 agütsütsü, ta US sorkari February ita sangdonga liasü.
Pa asüba osang ya NBC News, New York Times aser CNN amala US media outlet tem ajanga sangdong, kong iba osang ya US itdangiter ketdangsertem nungi angazük, ta ashir.
Hamza Bin Laden ya al-Qaeda lenir akümtsü ta takzüa liasü. Osang ajanga ashiba agi, pa ya taoba küm ana tsüngta military operation ka nung tepset aser yangji US sorkar dena lir, saka anogo aser mapang tejangja memetet.
Bodhbarnü osangbener temi asüngdang dang Tir Donald Trump-i kecha melangzü aser White House national security adviser John Bolton-ia kecha melangzü.
Al-Qaeda nungi iba osang jangjashija mali. Islamist telungpur busemertemi iba osang asoshi kümdanga alitsü ajungshi aser lenirtem nungi osang sangdongtsü ataa lir, ta BBC Monitoring nung teshisadanger temi ashi.
Hamza Bin Laden ya kiralongrar ka lir, ta US-i küm ana tejakdang sangdonga liasü. Pa ya tebu melener ka akümtsü ta aikati repranga liasü.
Pa ya Iran nung house arrest nung yua liasü, ta bilem, saka osangtem ajanga ashiba agi, pa Afghan-Pakistan arrtsü anasa liasü südi.
Pa ya Jeddah, Saudi Arabia nung aso aser iba sülen tetsü den Iran nung ali, ta amanger.
US state department ajanga ashiba agi, Bin Laden ya Abdullah Ahmed Abdullah mesüra Abu Muhammad al-Masri’er jala den kibong aküm, shiba 1998 küm Tanzania aser Kenya nung aliba US embassy tem nung bomb pokloktsüdak densema lir, ta tai tonglokja lir.
2011 küm US special forces temi tebu Osama ya Abbottabad, Pakistan nung tepset. September 11, 2001 anogo US nung lendong agüja nisung 3,000 jungnüa tepsetba ya pai melaba lir.
Saudi Arabia-i March ita Hamza Bin Laden indang senso agientsü.