‘Happiness Department’ aliba mezüngbuba state ji MP kümogo

Bhopal, July 15 (Agencies): Hokolbarnü India nung ‘Happiness Department’ aliba mezüngbuba state ji Madhya Pradesh kümogo.
State Chief Minister, Shivraj Singh Chouhan-i, Bhutan linük mesüka iba department-i nüburtem taküm nung tepela alitsü atema inyaktsü, ta ashi.
“State nung Happiness Department tentettsü atema Cabinet-i lemtet,” ta Chouhan-i ashi. Tang atemabo iba department nung pa tekolak asütsü.
Tang tasen tentetba department nung mongin nisungtem anioktsü aser parnoki nüburtem taküm nung tepela alitsü atema shisa agutsütsü ta shia chief minister-isa, “Nisungtemi nüngdakbatem- amtsüki, süoshi aser talidak ki dak alia pei taküm nung tepelaa nüngdaker,” ta metetdaktsü.
“Tepelaji rongsenkettsüng jenjang ainba ajanga asadanger, ajisüaka iba ya kanga shitakbo masü, kechiyong küm aika asen linük nüburtemi yamaji mebilemer. Nüburtem taküm nung tepela atema ano langka tali nüngdaker,” ta paisa ashi.
Pai ashiba agi, Bhutan nung tepela tangatetba lir aser par nüburtem tepela asadangtsü atema par linük nung “Happiness Index” lir.
Taküm Arpil ita nung state nung ‘Happiness Department’ tentettsü ta sangdongba mapang  Chouhan-i, nisungtem taküm nung rongsen kija ajanga tepela malitsü, ajisüaka parnok taküm nung tangatetba tajung agütsüba ajanga soseta asüba malitsü, ta jembia liasü.
April mezüngnü state BJP sanen luden senden nung Chief minister Singh-i, “Kiojen rongsen aliba mesüra terenlok kija ajanga tepelaji nisungtem dangi marur, saka timtem tejashi mapang nung soseta masütsüsa parnok nem  tesayuba tajung agütsüba ajanga arur,” ta jembia liasü.
“Asen sensotem libaliro nung tepelaba alitsü atema Madhya Pradesh nung onoki ‘Ministry of Happiness’ tenzüktsü sentong yangludar,” ta paisa metetdakja liasü.