Hariri Lebanon PM tanaben akümer

Beirut, November 03 (Agencies): Sunni kin nungi tongti yimsüsür, Saad al-Hariri-i Lebanon Ato Kilonser tanaben akümtsü temeten tanü, Brehostibar nü nguogo.
Hariri-i parliament speaker densema, MP yimsüsür timba nungi pa pusemtsü vote anguba sülen Lebanon Tir, Michel Aoun-i Hariri nem Lebanon sorkar tasenba tentettsü tetuyuba agüja liasü.
Opposition telok nungi Christian yimsüsür, Aoun Lebanon Tir menden bendaktsütsü densema, par yimtenren sabang nung tongti tezüngzüktep agiba sülen Hariri-i tan Ato Kilonser menden abentsü temetenji angur lir.
Iran linüki pusema nungitba Shiite telok, Hezbollah pusemsang, Aoun-a Lebanon Tir tasenba akümtsü atema Parlaiment yimsüsürtemi tan Hombar nü shim aser iba ajanga par linüki taoba ita 29 tashi ajuruba yimtenren makmakshimak tia tamajung agientsü tenzüka liasü.
Parlaiment Speaker & Shiite Amal yimtenren telok lenisang, Nabih Berri-i Hariri-i benokba yimtenren tezüngzüktep agitsü onük mezüngbo magizüki tan sorkar tasenba tentettsü mapatong nem tetsükdaktsü agüja liasü.
Ajisüaka, Berri-i tan Hariri Ato Kilonser shimtsü mapatong pusema nungitsü lemtetshiba osang metetdakja, Hariri-i aniba sorkar den amaliteptsü tenangzükba olen ka metetdaktsüogo.
Ano, Hariri-i opposition telok den yimtenren tezüngzüktep agiba ajanga par Lebanon kanga sashia pusema nungitba Saudi Arabia linüki Lebanon’er kibok ken o nung taoba mapang amabo tongti shilem magiba kuli angur lir.
Lebanon’er kin kidong yimsüsütsü tashi lemshibaren kübok Ato Kilonser menden abentsü atema Sunni Muslim yimsüsür, Tir menden atema Maronite Christian yimsüsür aser Parliament Speaker atema Shiit Muslim yimsüsür shimtsü lemzüka inyakteper.