Harry Kane teyari ajanga England qualify süogo

London, October 6 (Agencies): Brehostibarnü World Cup qualifier England aser Slovenia na tsüngda asaya nung Harry Kane-i mapang apuloktsür asayaba mapang nung goal ka idaktsüba ajanga England pur taruba küm World Cup nung asayatsü asoshi maongka ngutetogo.
Asaya nung England nunger captain-i Kyle Walker-i pa nem ball belenoktsüba minute 94buba nung kanga junga idakja liasü.
Iba asaya draw dang asünunga jungla kechiyong Slovakia madak 1-0 agi Scotland-i takok angu. Taküm küm linük aser club asoshi Kane-i tang tashi nung goal 14 agüja lir aser iba asaya nung pai goal agütsüba ajanga par telok nüburtemi aitsütsü nungi jenbuogo.
Pai goal agütsüba ya iba asaya nung pa asoshi maongka tanabuba ngutetba liasü. Asaya mezüng shilem nung pa asoshi maongka tajungka nguteta pia ball goal nung matsüoktsü saka Jan Oblak-i kanga junga nokdanga liasü.
Groupe F nung England puri point 23 nguteta parnok temeba jenjang nung lir aser parnok sülen tanabuba jenjang nung Scotland lir, shirnok Deobarnü Lithuania den tatembangbuba asayatsüba lir.
England nunger asayaba yimya ajanga Russia nung asayadang takok tajung angutsübo meimlar saka Kane dak parnok asoshi tiemla lir, shibai linük tenüng nung 22 ben asayaba nung goal 11 agüja lir.