Harry Maguire Manchester United nungi asayatsü

London, Luroi/August 02 (Agencies): England nunger football asayar Harry Maguire ya Leicester nungi sen million £80 agi Manchester United-i alizüktsü mulungtepogo aser ibai defender ka asoshi alima otsü tasen asütsü.
Arishi küm 26 tain Maguire ya hopta tsüngta club nung temang tendangba maparen tembangtsü imlar.
Crystal Palace nungi Aaron Wan-Bissaka aser Swansea nungi Daniel James anir aruba sülen Maguire ya taküm summer nung United-i anir arur asayar tasembuba asütsü.
2017 küm Hull City nungi Leicester-i aoba sülen pai iba club nungi Premier League asaya 69 nung shilem agia lir.
Iba tezüngzüktep ajanga Maguire ya alima nung defender jenjang tasaktiba kümogo aser January 2018 küm Liverpool-i Virgil van Dijk alizüktsü asoshi Southampton nem sen million £75 agütsüba pai alemtet.
United-i mapang talangka nungi Maguire sabua liasü, saka ita 12 tejakdang parnoki tezüngzüktep ka nungi atsüngin, kechiaser pa anir arutsü asoshi sen million £70 agütsütsü ya kanga tasak ta bilema liasü.
Taoba küm September ita pai Leicester nungi küm pongu asayatsü contract nung sign süa liasü aser manager Brendan Rodgers-ia season tatemi, Maguire ya iba club nung dang lira ano tajungba akümtsü, ta shia liasü.
Sheffield United nungi Maguire-i 2011 küm nungi asaya tenzüka 2014 küm Hull City-i maodang league nung iba club nungi asaya 139 nung shilem agi.
2016 küm Hull pur Premier League nung asayatsü jenjang ajungketba mapang pa iba club nung shilem ka liasü, saka ita 12 lir par telok relegate asüba sülena Leicester-i ao.
Pai England asoshi August 2017 nungi asaya tenzük aser Russia nung 2018 World Cup semi-finals tashi tongtetba nunga pa densema liasü.
Manchester United nungi pa dena central defender tenet lir aser parnokji Victor Lindelof, Eric Bailly, Phil Jones, Chris Smalling, Marcos Rojo aser Axel Tuanzebe nungertem alitsü.

You must be logged in to post a comment Login