‘Harry Potter’ Actor Jim Tavare gari lendong ka nung kanga mejungi yiru

March 09, 2017 : Comedian aser actor Jim Tavare, shiba Harry Potter movie ka nung khen shilem agi, pa gari lendong ka nung adenba sülen tang ICU nung lir. Iba lendong nung pa tekong raksa, aser tepokbok pokma.
Küm 54 tain England nunger actor-i Harry Potter movie, ‘The Prisoner of Azkaban’ nung Leaky Cauldron indang Innkeeper Tom ama shilem agia lir.
Tavare yiruba osang kinungtsü Laura-i pa indang face book page ajanga agütsü. Aji saka iba osang nung gariji kong aser koda tsükok, ajibo kecha shisema maliasü.
“Jim’er kinunger nem osang agütsüba sülen pai nenok ajak nem osang agütsütsü asoshi ashiba ajanga, ni Laura-i iba osang agütsür. Pa yashi gari tsüktepba lendong kanga tamajung ka nung densema liasü,” ta kinungtsüi sangdong.
Kinungtsü osang den külemi Tavare mozüki yipten nung shia arur tangokba noksa ka inoksemer liasü.
“Pa tang ICU nung lir. Pa tesaret 15, tekuret anaprongla, aser tetsüng tachiji aisü nung sükdanga lir. Maneni tebokpok pokma aser tekong dena raksa. Pa azü anabenbo agiogo aser mezüngbuba operation agitsüba lir,” ta kinungtsüi shisem.
Tavare ya Royal Academy of Dramatic Art nung azüng. Iba sülen pa asayamener ka ama mapang talanga inyaka aru. Pai shilem agiba shia ‘double bass’ ka amersa shilem agi. Maneni pai movie aika nung shilem agi, aser comedy series ‘The Sketch Show’ züluba nung shilem agiba atema BAFTA award ka ngua liasü.