Harry Potter nung shilem agisang, Robert Hardy süogo

London, August 04 (Agencies): ‘All Creatures Great & Small’ TV series nung shilem agisang, Robert Hardy arishi küm 91 lia süogo.
Hardy ya theatre, television aser film industry nung küm 70 dak tali liasü aser pa ya aiben Winston Churchill ama shilem agi.
Tesüsa Hardy ya Harry Potter film pezü tashi nung Minister for Magic, Cornelius Fudge yimya nung shilem agia lir.
BBC indang All Creatures Gread & Small nung shilem agidangbo Hardy ya Britain nung actor tajung rongnung ka, ta züngshia liasü.
Cheltenham, Gloucestershire nung soa intetsang Hardy ya arishi küm 24 tain lia Stratford nung aliba Shakespeare Memorial Company indang film nung shilem agia tenzük aser Royal Shakespeare Company indang Coriolanus stage adaptation nunga tongti shilem agi.
Hardy asüba osang angashia kanga jashir, ta zülur pa indang noksa ka Royal Shakespeare Company ajanga post sütsü.
British Film Institute-ia asükhu lemsatepa osang sangdong aser Hardy azüngba Magdalen College-ia asüku Twitter nung lemsatep.
1955 küm Othello indang TV series ka nung Hardy ya Cassio ama shilem agia lir.
Mary Shelly indang Frankestein aser 1995 küm Sense and Sensibility film tem nunga Hardy-i tongti shilem agia lir.
Hardy ya Winston Churchill: The Wilderness Years film nung kanga junga shilem agiba ajanga 1982 küm Bafta sempet angu aser 2015 küm Winston Churchill: 100 Days That Saved Britain nunga tongti shilem agi.
Pa ya London tezülen actor atema yanglutsüba retirement home, Denville Hall nung August 03, 2017 anogo asü.