Harvard-i 10 ben magizük saka tangbo alima nung takartiba rongnung ka

New Delhi, September 16 (Agencies) : Tom Hanks-i shilem agiba film ‘Forrest Gump’ nung “Takümji chocolate pongdang ka mesüker. Na kechi angutsüar memetet” ta jembiba olenji Alibaba tenzüker, Jack Ma-i kanga sapur.
Davos nung World Economic Forum alidang osangbener kati Jack Ma den sensaksemdang pai pa taküm nung tamakok aika anguba ajanga pa taküm yanglushiba indang ashi.
Tang alima nung takartiba nisungtem rongnung Jack Ma densema lir aser pai ashiba agi pa primary school tatidang nung anaben tashi tamakok angu, middle school nung asemben tamakok angu aser police nung adentsü tenüng agütsüba magizük.
Pai Harvard nung azüngtsü atema tenüng agütsü saka terben tashi pa magizük, ta Jack-isa ashi.
“Iba sülen ni künübo Harvard nung tesayur inyaktsü ta bilem” ta paisa shisem. Idangji pa interview asür TV host, Charlie Rose-i “Ibaji takoktsü” ta langzü.
Jack-isa ashiba agi, pai fast food chain KFC nung inyaktsü atema merang saka idakjia tamakok angu.
“Kodang KFC China nung onok aliba yimtii aru, nisung 24-i mapa inyaktsü atema tenüng agütsü aser parnok 23 shim. Nisung ka dang meshim aser ibaji ni liasü” ta Jack-isa metetdaktsü.
Jack Ma ya October 15, 1964 nung aso aser China nunger business mongin aser alima atema tenla agütsür ka lir.
Forbes cover nung China nunger mezüng noksa adokbaji pa lir aser November 2014 tashi nung pa ya China nung takartisang lir aser alima nung takartiba rongnung menden 18 buba nung pa lir. Bloomberg Billionaires Index ajanga ashiba agi, Jack Ma indang rongsen dollar sen 29.7 billion shi lir.