Haryana assembly nung Jat Quota bill agizükogo

Chandigarh, March 29 (Agencies): Mongolbarnü Haryana Assembly nung Jat nunger aser tanga kintem atema mapa wazüka yutsütsü asoshi Bill ka agizükogo.

Tang tagidak assembly nung Haryana Chief Minister, Manohar Lal Khattar-i Haryana Backward Classes (Reservation in Services & Admission in Educational Institutions) Bill, 2016 benokba sülen minute 15 tsüngda ‘voice vote’ ajanga iba Bill agizük.

Yashi State Cabinet-i Jat kin den tanga kin pezü- Jat Sikhs, Tyagis, Bishnois aser Rors nunger atema reservation Bill agizükba sülen tanü assembly nunga iba bill agizük.

Khattar-i, sorkar mapa balala aser kaket rejutem nung menden wazüka yutsütsü atema Jat kin aser tanga kintem dang nangzükba ama sorkari ataloktsüogo, ta ashi.

Assembly nung iba Bill agizükba sülen Jat lenirtem tsüngda telemsa adoka lir amai ajiteter. Jat lenir, Hawa Singh Sangwan-i iba Bill pelaa agizük, ajisüaka Jat lenir, Yash Pal Malik-ibo, iba Bill ajanga Jat nunger atema mulungsüa meinyaktsü, ta ashi.

Ano külen Congress lenir aser taoba mapang minister, Ajay Singh Yadav-i, iba Bill agizükba ya Haryana atema “tanak anogo” ka lir, ta ashi.

Ano Jat nunger takhangba anema arusang BJP MP, Rajkumar Saini-ia, iba ya democracy tepsetba lir, ta aitsüogo.

Taoba ita Jat nungertemi iba takhangba agüja anogo 9 lungkak aitdang nisung 30 asü aser nisung 320 yiruba den nija aser sorkar kiojen sen crore aika jenjang takoksa nguogo.