Haryana-i e-governance atema sempet angu

Gurugram, November 5 (Agencies) : India Today-i New Delhi ayonga amungba ‘State of the States Conclave 2016’ sentong nung tangar dang nungi e-governance kanga agi tajungba inyaktetba atema Haryana sorkar nem sempet ka agütsüogo, ta Honibarnü ketdangser kati ashi.
Iba sempet Union Finance Minister, Arun Jaitley-i agütsüdang Haryana Chief Minister Manohar Lal Khattar tenüng nung Principal Secretary Rakesh Gupta-i agizüka liasü.
State nung tesüiba küm ana tashi e-governance tsütsü kanga tashi ita inyakba atema tenüngsang agütsür, ta Jaitley-i Gupta dang ashi.
Khattar-i aniba sorkari e-governance kübok inyakyim tenzüka inyakbatem aser Chief Minister-i Harayana state ya digital inyakyim nung kanga tashi tait telok ka küma melener, ta Gupta-i Union Minister den lemsatepa liasü.
Khattar-i pa nija agitsü amai kanga meranga inyakba ajanga, tesüiba mapang national kübok e-governance kanga tashi mait aliba, Haryana state, tangbo tanga state tem dang nungi temaba kümogo, ta paisa ashi.
Gupta-i, state sorkar Digital India inyakyim nung IT nükla lokteper inyakdar, ta shisem.
Pai, ‘One-State One-View’ inyakyim kübok SRDB (State Residents Data base) inyakyim tenzükogo. Iba inyakyim ajanga de-duplication maparen takok ngua inyaktettsü, ta ashi.
Züngsem ajak indang nüngdakba osang ajak Aadhaar den sendaktepa akümba ajanga LPG subsidy atema tenüng agütsüba mapang state sorkar-i kerosene totzü agir aser Fair Price Shop tem nung jang agir lakh 6.25 jangjaogo.
Ration cards lakh 1.5 shi taila aliba putetogo. Iba inyakyim ajanga subsidy nungi alepzüka agirtema puteter.
Tanurtem school nung admission agidang parnok Aadhar number den sendaktepba ajanga admission lakh 4.5 shibo teyazü liasüba putetogo, ta Gupta-i ashi.
Iba inyakyim ya ajanga scholarship, mid day meal aser tanga nüngdakbatem nung sorkar sen teyazü nung melalui kümzüker.
Gupta-i, 2015 netsüng yongsük asadangdang Haryana sorkari Aadhaar scheme noklang nung noklang inyaktetba nguteta lir, ta ashi.