Haryana nung Jat nunger longkak aittsü

District 7 nung Section 144 benokogo

Gurgaon, June 04 (Agencies): Jat nungertemi sorkar mapa aser shisaliok rejutem nung menden wazüka yutsütsü takhangba agüja June 5, 2016 nungi longkak aittsü sentong lia tanü Haryana nung lendong adoktsüsa aliba district tenet nung nisung 5 dak tema madenshitsü atema tetuyuba agütsüogo.
Taküm February ita nung Jat nunger longkak aitdang rara sashia adokba district tenet nung CrPc Section 144 benokogo. Item district rongnung Rohtak, Gurgaon, Jhajjar aser Sonipat district tem densema lir, ta sorkar kedangser kati ashi.
Social media ajanga raratep adoktsüsa jembiba aser olulu prokba nokdangtsü atema police-i junga mita reprangdar, iba dak alia district tenet nungji Paramilitary sepaitem yoka lir.
Other Backward Caste (OBC) category kübok Jat nunger nem reservation agütsütsü atema sorkari benoka liasü, ajisüaka Punjab & Haryana High Court-i ibaji tang tashi sota aliba anema All India Jat Aarakshan Sangharsh Samiti (AIJASS)-i longkak aittsü atema tayongzükba agüja lir.
Tesünep nung longkak aittsü atema ketdangsertemi district shia nung tesem kaka lemzükja lir.
Khap Panchayats-ibo longkak aittsüji magizük saka Jat lenirtemi Haryana sorkar dang longkak süngjema dang agitsü, ta shiogo.
Osangbenertem den jembidang Haryana Cabinet Minister, Krishan Lal Panwar-i, “Parnoki sorkar dang yimtsüngtem nung ang süngjema longkak aittsü aser jila/yimtitem nungbo longkak maittsü ta shiogo,” ta ashi.
Minister-isa ashiba agi, Jat nungertemi train mesüra gari lenmanga menokdangtsü ta shiogo.
Ano külen Haryana Police-i sepai shianga nema sodi magütsüi mapa lemzüktsüogo.
Taküm February ita nung Jat nunger longkak aitdang nisung 30 dak tema asü aser sen crore aika jenjang kiojen raksaja liasü.