Haryana nung kaketshir kati tesayur ka khaset

Sonipat, Metsüremi 13 (Agencies): Aiben matalokdangba lendong ka Haryana kübok Sonipat district nung atalokba nung, kaketshir kati tesayur ka khaset. Sonipat district kübok Kharkhoda nung aliba college ka nung ad hoc lecturer ka kaketshir kati Tentonü khaset. Iba tesayur tenüng ya Rajesh Malik lir, pa arishi küm 35 nungi 40 tsüngta liasü, ta Haryana Police temi ashi. Iba lendong agütsüsang ya tang tashi mejangjateter aser pa ya kasa college nung kaketshir alitsü südi, ta ashir.
Malik-i ya English tesayur ka liasü aser pa khasetba kuli ya anu mejangjateter, ta kaketshirtemi ashir.
College telung nung iba nisungba yagi revolver ka ajanga injang asem mesüra pezü khaloktsü aser injang ka agi Malik dak teku nung khashi. Iba sülen pa iba zübu ajanga asü, ta police ketdangsertemi ashi.
Lecturer dak injang khaloktsüba sülen iba nisung ya jena ao, aser iba tatalokba bushisüngdang südagi, ta police-i ashi.
“Malik ya steno room nung mena lia nisung ka tejak nembanger arua pa dak injang khaloktsür ajen. Ibai kanga kera atalok. Pa (aibelensang) ya kaketshir mesüker saka pa ya iba college nungi asü masüar ashitsü makok,” ta lendong atalokba mapang college nung alir professor kati ashi.
Taküm Aenjeti (January) nunga Yamunanagar district nung Class 12 nung azünger kaketshir kati tebu indang revolver ka amshia par school principal khaset.