Haryana nung nija Hospital ka anema tai tonglokja lir

Chandigarh, November 04 (Agencies): Medical Council of India-i hospital mita reprangtsü lia Haryana nung aliba nija hospital kati hospital nung shirangertem aika lir ta sayutsü atema yimtaklirtem sen noklang 200 agi mesüzüka shirangertem ama sayudaktsütsü atema jembiba atema tai tonglokja lir.
Medical college ka, ta agizüktsü atema inspection ji nüngdak. Medical Council of India-i lateta aliba temzüng nung MBBS kaketshir 100 admit asütsü atema hospital ka nung tajemba agi yipten 600 bo alitsüla aser tajemba agi shiranger shilem 70 bosa alitsüla.
Audio clip ka nung iba nija hospital nungji inyaker kati shirangertem ama sayutsü atema yimtaklirtem sen agi mesüzükba o mangaoka lir. Haryana sorkari ibaji bushisüngdangtsü tuyuogo.
October 3 nü state health department nungi ketdangsertemi Adesh Hospital mita reprangtsü lia iba hospital jagi yimtaklirtem mesüzük, ta tai tonglokja lir.
“Sir, onoki ner yimtsüng nungi nisung nüngdaker. Asüng onok college (medical college & hospital) mita reprangtsü. Health minister arutsü. Onoki nisung kar anir oner. Onoki parnokji shirangertem ama admit asütsü. Parnoki shirangertem ama dang sayutsü. Onoki chiyungtsü angati agütsütsü aser nisung shia nem sen 200 agütsütsü,” ta hospital nung inyaker kati taoba mapang yimtsüng nung tekolakba, JD Singh dang ashiba oji audio clip nung mangaoka lir.
Tesülen Singh-i NDTV dang ashiba agi, “Par (hospital) employee kati kü dangi call asü. Inspection team matsüngdang shiranger ama sayur ajak nem sen 200 agütsütsü ta pai ashi.”
Ajisüaka hospital ketdangsertemibo iba nisungbaji parnok employee masü ta shiogo.
Adesh Hospital Principal, Dr Mandeep Singh-i, “Onok rongnung paji mali aser shiranger ama sayutsü atema onoki nisung shinga nema sen magütsür. Nenoki hospital ya ngua dang lir…iba ya junga odar aser sangküm January mesüra February ita nung mita reprangba mapang MCI (Medical Council of India)-i lateta aliba jenjangji onok atongtsü meranger,” ta ashi.