Haryana nung police-i Al Qaeda züngsem ka apu

New Delhi, January 18 (Agencies): Haryana, Mewat district nung Al Qaeda kiralongrar ka puogo, ta Delhi police osang ka ajanga metetdaktsü.
Abdul Sami ya yaküm Indian Subcontinent nung Al Qaeda-i tentetba kongsang AQIS züngsem ka lir aser Delhi Police Special Cell-i pa apuba sülen February 1 nü tashi police ket nung ayutsü temelaba agütsüogo.
Sami ya Jamshedpur nungi lir aser pa Odisha nungi cleric ka tenüng agi Abdul Rashid den metettepa liasü. Tamalen pai Dubai adena oa Pakistan nung Karachi semdang aser Mansera, Pakistan nung training agia liasü, ta police osang ajanga ashi.
2014 September ita nung taoba mapang Osama Bin Laden-i aniba Al Qaeda teloki Indian subcontinent nung kongsang ka tentettsü ta sangdonga liasü.
Iba mapang nungji video osang ka ajanga Qaeda lenir Ayman al-Zawahiri-i, “Onoki Indian subcontinent nung tanaben Islam arudaktsüner, iba ya mamakdangbo Muslim lima nung densema liasü. Iba ya ajanga Burma, Kashmir, Gujarat, Bangladesh, Ahmedabad aser Assam nung aliba Muslim nungertem tenzüktsü,” ta sangdonga liasü. Tentet tasenba atema tongtiba nükjidong trok rongnung “Indian sub continent nung ‘sharia’ ozüng benoktsü aser Muslim nung meyong ali tangari atsünga aliba talenba nungi salatsü’ densema lir.
Middle-east nung ISIS jenjang kanga junga amentetba ajanga AQIS jenjang mejungi akum.
2011 küm US sepaitemi Pakistan nung Osama Bin Laden tepsetba sülen nungi Al Qaeda-i timtem ajurua arur aser pakzüka aoba telok, ISIS dang nungia amokmeren ajurur.
Syria nung Al Qaeda den densema teloktembo IS den aiben rara arur.

You must be logged in to post a comment Login