Haryana nung police ketdangser kati nisung 4 kahset

Chandigarh, May 25 (Agencies): Haryana NCR, Palwal district, Hatin Block nung police nungi anentsür aliba assistant sub inspector (ASI) kati Bodhbarnü kibong ka nungi züngsem pezü tashi kahset.

Aija alisangji Yahiya Khan lir ta jangjaogo aser pai temelaba maliba prangpong kati par pezü kahset. Asürtemji arishi küm 65 Deen Mohahammad, par jabaso Razzaq, Deen Mohammad’er kinünger Hamid Khan aser Nasim nunger lir aser parnok ajak iba tesem nungjisa asü.

Palwal SSP, Rajesh Duggal-i ashiba agi, tang police-i Yahiya Khan tebushitak lir. “Mezüng bushisüngdangba ajanga, prangpong jagi anasa nungi chitepa yur injang kahloktsü. Tasümangteji postmortem atema bener ogo,” ta SSP-i ashi.

Gurgram district nung ken o ka tim mesüi bushisüngdangba atema 2014 November ita nung Yahiya Khan mapa nungi anenja liasü, ta Duggal-i ashi.

Osang ajanga angazükba agi, Yahiya’er adianu ka aser Deen Mohammad’er kinünger nati kibong ka nungi aianu ana den kibong küma lir, aser Hombarnü kibong ana tsüngdaji mangtatettep adoka liasü.