Haryana nung tensa tajungba akümer; Army-i Munak Canal azüokogo

New Delhi, February 22 (Agencies): Sorkari Jats nunger takhangba agizükba sülen anogo ka lir, Jat nunger lungkak aitertemi Hombarnü tongtibang highways aser railway lenmangtem toktsür ainshitsü tenzükogo.
Haryana nung tensa tajungba küma odar aser Hombarnep Army-i Sonipat nung aliba Munak Canal azüoktetogo. Iba tesem nungi Delhi-i tzü mesüa bener aoer aser Jat nungertemi anogo ishika iba canal makbanger lungkak aitba ajanga Delhi nung tzü peria mongui timtem ajuru.
Jat nunger lungkak aitba mapang tasür kibong shia nem sen lakh 10 aser mapa agütsütsü ta sorkari tanü metetdaktsü.
Hombar aonung tesü, Jat nunger tanishirtemi sorkar ketdangsertem den senden amendang parnok tsüngda onük aika angatettep.
“Sorkari onoki akhangbatem agizüka inyaktsü nangzükogo onokia parnok den amalitepa inyaktsü nangzük” ta Jat Arakshan Andolan (Jat Reservation Movement) convener, Ramesh Dalal-i osangbener dang ashi.
Tanü Sonipat anasa lungkak aitertemi khu abenba train ka nung mi senoktsü aser item tatalokba azüoktsü atema sepai meyirjang aika mapa lemzüktsü. Haryana den kidanger state Rajasthan nunga Jat nungertemi bus gari kar mi agi rongdoktsü.
Jat nungertemi lungkak aitba ajanga train 850 thinentsüsa aküm, factory 500 shibang aser shishilembaba dak sendakba maparen nung sen crore 34000 akoksaogo, ta Assocham sangdong ka nung metetdaktsü.

You must be logged in to post a comment Login