Haryana nung yim 1,000 nem light supply methitemi agutsütsü

Hisar (Haryana), August 07 (Agencies): Tanü Haryana Chief Minister, Manohar Lal Khattar-i, ano state nung yimtsüng 1,000 nem August 15 nü nungi tenzüka power supply tanen makai agütsütsü, ta metetdaktsü.
State nung power Line loss shilem 30 aliba nungi shilem 25 dang kümogo, aser ibaji state sorkari ‘mhara gaon jagmag gaon’ (Our village, illuminated village) scheme kübok mera balala agia inyakba ajanga lir. Iba ya ajanga state nung tajangzük angur aser nüburtem nem nüngdakba power supply agütsür, ta Hombarnü Chief Minister-i official sangdong ka ajanga metetdaktsü.
“Maneni taruba küm ana tsüngda line loss ji shilem 20 tashi ajema alutsü imlar. Aser ibaji ajanga state tesem ajaklen power supply anogo nung ghonda 24 agütsütettsü,” ta sangdong nungsa shia lir.
“Tang yimtsüng 500 nung power supply anogoshia ghonda 24 agütsüdar, ano August 15 nü nungi Ambala aser Gurgaon districts kübok yimtsüng 1000 nunga kasa maongka angutsü,” ta pai ashi.
Paisa, state sorkari yimtiba nung kilometer 250 telungtet nung airports amenoktsü sentong lir, aser iba atemaji pai asüng state civil aviation department ketdangsertem den senden amentsü, ta metetdaktsü.
Chief minister-isa, taruba anogo ana tsüngda pai state nung district shia semdanga terenlok mapatem reprangdangtsü aser nüburtem timtem reprangshitsü, ta metetdaktsü.
‘Janata darbar’ sentong nung Khattar-i Haryana Police department danga ken o ajak agizüka FIR benoktsü metetdaktsüogo.