Haryana nungi sen crore 3.5 bener aruba nisung ka Dimapur nung apu

Dimapur, November 22 (Agencies) : Bihar nung amenoka aliba shishilembar kati tayimtsü ka hire süa bener, tang melendoktsü aliba sen 500 aser 1000 senpaktem pa kija sen crore 3.5 bener aruba puteta Dimapur airport nung apu.
Pa mener aruba tayimtsü Dimapur tonga arua anenli Central security aser CISF agency tem nungi ketdangsertemi pa dang asüngdangya asüba mapang, iba nisung ya Munger district, Bihar nungi A Singh lir ta jangjaogo.
Iba ken o ya Dimapur nung aliba Income Tax ketdangsertem nem bendanga agütsüogo. Parnoki ashiba agi, iba nisung ya Mongulbarnü Sirsa, Haryana nungi hire asüba tayimtsü ka nung Dimapur tonga aru.
CISF-i osang kar angashiba sülen A Singh Dimapur tongli pa apu. Mezüngbo pai bena aliba senji crore 5.5 ta bilem ajisüaka khen lir külen I-T ketdangsertemi sen crore 3.5 ang liasü ta osang tejangja metetdaktsü.
“Tax ketdangsertemi iba sen kechi nungi aru ibaji bushisüngdangba mapa tenzükogo,” ta parnoki ashi.
Sorkari sen 500 aser 1000 senpaktem melentsü osang agütsüba sülen security agency aser airport anükba Central Industrial Security Force temi tayimtsü anenba tesemtem metitemi mita atar.