Haryana Police-i Honeypreet aputsü tetuyuba agütsüogo

Sirsa, September 01 (Agencies): Tawa Dera Sauda Saccha tongti, Gurmeet Ram Rahim Singh, court nungi jendaktsütsü atema asalentongba atema Haryana police-i Honeypreet Insaan bushia aputsü atema tetuyuba agütsüogo.
Honeypreet shidakba tenüngbo Priyanka Taneja lir, aser la ya Ram Rahim-i lar jala ama agia liasü.
August 25, 2017 nü Panchkula nung aliba special CBI court-i Ram Rahim pua aliba mapang nung Honeypreet den Dera security team kati pa anir ajentsü atema sentong yanglua liasü, ajisüaka Panchkula police aser Army temi iba sentongji lazük.
Iba sülen August 28, 2017 nü CBI judge, Jagdeep Singh-i, 2002 küm Ram Rahim-i tetsür ana tashiyim amshia taküm raksatsüba ken o nung pa küm 20 tashi tepoukdak ayutsü obendang agüja liasü.
Iba obendang agütsüba sülen Honeypreet samaadok aser tang tashi jenshia senzüdar.