Haryana school kakettem nung Gita, Quran, Laishiba züngoktsü

Chandigarh, July 03 (Agencies): Haryana nung school tem atema textbook tasen July 5 nü sayatsü.
Yaküm Haryana sorkari sorkar school kakettem nung Bhagavad Gita (Hinudu nunger temeshi kaket) inoksemtsü atema lemtetba ajanga aikati state sorkar aija liasü, iba sülen tatemsa tangbo sorkari sorkar school tem nung Gita dang masü saka Quran (Muslim nunger temeshi kaket), Laishiba (Bible) aser Guru Granth Sahib (Sikh temeshi kaket) inoksemtsü lemtetogo.
Deobarnü iba osang metetdaktsüdang Haryana Education Minister, Ram Bilas Sharma-i, class 6 nungi class 12 tashi nung moral education subject nung tamangba yimsü kakettema inoksemtsü, ta ashi.
Item kaket tasentemji July 5 nü Kurukshetra University nü sentong ka alidang sayatsü.
Sharma-i sangdong ka ajanga, “Tamangba yimsü ajaki nisung tajung akümtsü atema sayur. School kakettem nung Bhagavad Gita, Quran, Bible aser Guru Granth Sahib tekongtem inoksemtsü. Class balala shia textbooks balala alitsü,” ta ashi.
“State sorkari iba curriculum ya lokti tentet balala aser shisashir balala den jembitepa renem,” ta paisa ashi.
Yaküm Haryana sorkari school kakettem nung ‘Bhagavad Gita’ inoksemtsü lemtetba sülen opposition party, Congress-i, Hindu tamangba yimsü nung ajemdaker shisaliok benoktsü meranger, ta aija liasü.
July 5 nü sentong nung Haryana Angh, Kaptan Singh Solanki, Himachal Pradesh Angh, Acharya Dev Vrat, Gita shisashi, Swami Gyananand, Patanjali Vidyapeeth nungi Acharya Balkrishna aser Centre den state naprong nungi minister tem adentsü.
2014 küm October nungi state nung BJP sorkar tashi nung lir.