Havildar Barpeta dang pa India senso ka ta kuli agütsütsü asoshi tetuyuba agütsü

Guwahati, November 5 (Agencies): Indian Army nungi anener aliba Havildar ka dang pa India senso ka kuli tejangja sayutsü asoshi Assam nung Foreigners’ Tribunal-i tetuyuba agütsüogo. Iba tatalokba ya taoba ita Tribunal ajanga Indian Army nungi anener aliba JCO ka dang kasa kuli meshiba sülen, tang ataloker.
Assam, Barpeta district nung aliba Foreigners’ Tribunal ajanga Havildar Mahiruddin Ahmed aser pa kinungtsü Husniara Ahmed na dang November 6 nü Tribunal matsüngdang, tena India senso tajung kaka, ta asüba kuli tejangja agütsütsü asoshi tetuyuba agütsüogo.
Basir Uddin ya 1964 küm January 1 nü aso aser pa Barpeta district kübok Khablarbhita yimdak alir. Mahiruddin class 10 tatidang 1980 küm pass asü aser India Army nung 1986 küm züngoksem. Pa 2004 August ita Havildar ka ama mapa nungi anen. Pa tatembangsa Bathinda, Punjab nung inyaka liasü.
“Iba ya ozüng alema lir, aser langka tai lir. Iba dak sendakba nung onoki ozüng tsütsü nungi teyari bushidar. Ajisüaka India Army nung mapang papika ya tenzüka arur yamai mezüngmeshia benshiba ya kanga dang taoksatsüka aser tejashitsüka lir,” ta Mahiruddin-i Honibarnü ashi.
Paisa ashiba agi, pa kinungtsü Husniara ya Sarbesh Ali’er jala lir aser kasa district kübok Khablarbhita yimtsüng nung alir. La 1692 küm aso aser tebu tenüng 1966 küm voters list serial no 659 nung angutsü.
“Kasa mapang nung kü adianu ka Assistant Sessions Judge ka ama inyakogo aser ano ka BSNL nung tinyakdak lir. Ni India senso ka mesera kodaser India Army nung dentettsü? Army nung adentsü asoshi shimshiba maparen kanga dang kümdanga inyaker aser India nunger masürtem iba nung shilem magidaktsü,” ta paisa ashi.