‘Hawalabaaz’ Congress’ ajanga democracy menentsür:PM

Bhopal, September 10 (Agencies): Congress Tir Sonia Gandhi BJP-i election mapang nung nangzükbatemji ‘hawa baazi’ (o tazüngla) ta shir anogo ana nü lir külen, Ato Kilonser Narendra Modi-i Brihostibar nü congress dang ‘hawalabaaz’ (teraksar) ta jaloktsüogo.

“‘Hawala baazi’ (teraksar) rongnung adenertemi ni ochishia inyakba raksatsütsü meranger,” ta tan tatar hoho nung tatar senden amenba mapang Goods & Services Tax (GST) Bill merenemi senden tembangtsüsa akümba ajakto congress ajanga lir ta Modi-i aija ashi.

Aji oda süaka pai aniba sorkari iba ama mangatettep aser logjam nungi lenmang kabosa patettsü, ta pai ashi.

Ato Kilonseri aniba Union Cabinet-i tan mementeti anenba sendenji ano khen lir amentsü lemtetogo, ta Brihostibar nü ashi.

“Onoki Opposition telok ajak den tatar senden mena anünga ayuba onük lemtettsü asoshi jembiogo saka telok kati memulunger aser iba telok (congress) jagi democracy menentsür,” ta Modi-i asüngdanga liasü.

Taküm August 13 nü tatar senden tom nung anenadok aser iba sülen Modi-i aniba sorkari GST Bill lateta agüzüktsü atema tanaben senden mennüa liasü.

“MP 400 alirba tanübo 40 dang kümogo. Ajisüaka takok o tamakok mapang ajak nung political telok kati nüburtem aser linük ajungtsü asoshi bendanga agüja inyaktsüla, Opposition temi ibajibo meteta lir, ta onokibo bilem. Logjam südaktsürtemi tesüiba election nungi parnok nüburtemi sentokba magizükteter,” ta Ato Kilonser Narendra Modi-i ashi.

“Aji oda süaka onoki logjam asoshi lenmang kabosa bushitsü. Sorkar mapaji tasen purapitetba lapoktsütsüba atema dang masü,” ta pai shisem.

Ato Kilonser-i, cooking gas cylinder agizüktsü asoshi Aadhar card aser Jan Dhan account tem den sentaktepa kümdaktsüba ajanga sorkar senpong nungi sen crore 19,000 tugotsü aliba kümzükteta lir aser hawalabaazi (congress) teloki ni inyakba tendangtsü meranger na, ta ashi.