HCHSS Dimapur ‘Tobacco Free Zone’ ta sangdongogo

Dimapur, February 23, 2016 : Holy Cross Higher Secondary School Dimapur ‘Tobacco Free Zone’ kümogo ta school asayamung Hon Jubilee sentong nung EAC Niuland, Rongsenmenla-i sangdongogo. Tesüiba mapang school nung zünga intetla EAC, Rongsenmenla-i iba asayamung lapoktsü aser kaketshir ka dak lenir jakla alitsü nüngdak ta ashi.

Dimapur, February 23 (TYO) : Holy Cross Higher Secondary School Dimapur (HCHSS) ‘Tobacco Free Zone’ kümogo ta school asayamung Hon Jubilee sentong nung EAC Niuland, Rongsenmenla-i sangdongogo.
Tesüiba mapang Holy Cross Higher Secondary School nung zünga intetla EAC, Rongsenmenla-i school asayamung Hon Jubilee sentong lapoktsü aser school nung azünger kaketshirtem dang lenir ka jakla alitsü nüngdak ta ajungshi.
Lenir jakla, angazüknüba shisatsü aser saisapong jangraba melira shisatsü teperi masü, ta lai ashi.
Yimya tajung agi asayatsü ajungshidang, lai, linüki tapu ajak nung tashi ita aliba nübu nüngdaker. School inyakyim aser kaketshir ka tapu ajak nung renloktsü asoshi saisapong-a kanga tongtibang lir, ta ashi.
School-i “tobacco free school” ta sangdongba atema tenüngsanga ashiba mapang Rongsenmenla-i, iba ama temetettsü ya mezüngyongi züngzünga metetdaktsütsüla aser moko agi timtem balala adokdaktsüba meteta aliyim angatetdaktsütsü asoshi tetemsü tesemji school lir, ta ashi.
Lai okila nung school saisapong Hon Jubilee sentong nung arua shilem agitetba asoshi pelaba metetdaktsüdang, tesüiba mapang school nung kaketshir ka ama lai, ni iba school-i kanga nema tanga arur aser tesüiba mapangtem kanga menungra bilemteter, ta ashi.
Iba saisapong sentong ya school nung house balala, NCC cadets, Scouts & Guides aser school band temi march past ajanga shilem agia tenzük.