HCs nung obendangertem menden tazüng 500 lir: CJI Thakur

New Delhi, November 26 (Agencies): Honibarnü Chief Justice of India (CJI), T S Thakur-i, high courts nung obendangertem agi kanga anünger, ta metetdaktsü.
All India Conference of Central Administrative Tribunal (CAT) nung jembidang Thakur-i, “High Court tem nung obendanger menden tazüng 500 lir. Parnok tanü mapa inyaka alitsüla, saka meinyaker. Tang India nung aliba courtrooms aika menden tazüng lir aser obendangertem mali. Temepishiba aika benoka lir saka itemji anüngdaka lir. Iba timtem anentsü atema sorkari inyaktsü ta ni amanger,” ta ashi.
Thakur-i jembiba o nung ai-aura makai Law minister, Ravi Shankar Prasad-i, taküm sorkari obendanger 120 shimogo, aser 1990 küm sülenbo ibaji timtiba asütsü. 2013 küm obendanger 121 shim, ta ashi.
“Onoki pai (CJI) jembiba o nung ai-aura makar. Taküm onoki obendanger 120 shimogo. Ibaji 2013 küm 121 sülenbo tang timtiba lir. 1990 küm sülen 80 shim. Lower Judiciary nung menden tazüng 5,000 lir aser iba nungji India sorkar shilem mali. Ibaji Judiciary-i inyaktsüla,” ta Prasad-i ashi.
Taoba ita nunga Supreme Court-i, High Court balala nung obendangertem shimtsü atema SC-i benokbatem Centre-i sendoka yutsür, ta aija liasü.
Judicial tashimait kümdaktsütsü atema merangbaji magizüktettsü ta shia Thakur-i, obendangertem nüngdakba agi Karnataka High Court nung kishi ajak shibanga lir, ta aija liasü.
Tamalen Thakur-isa, Mapang ka nungbo obendangertem liasü saka okadak maliasü, ajisüaka tanübo okadak takdangtem lir saka obendangertem mali. Nenoki (sorkar) okadak ajak shibangtsüba tajungba asütsü, ta sorkar aija liasü.