HDK-i Opposition longjema lir ta ashir, BJP-i ochimashirtem ta aitsür

Vidhana Soudha nung HD Kumaraswamy-i Karnataka Chief Minister inyaktsü tezüngzüktep agiba sentong nung UPA Chairperson Sonia Gandhi, BSP President Mayavati, West Bengal Chief Minister Mamata Banerjee, Sharad Yadav, Akhilesh Yadav, Tejashwi Yadav, Rahul Gandhi aser tanga lenirtem külemi agiba noksa ka angur.  (Bengalaru, May 23)

Bengaluru, Monupii (May) 23 (Agencies): Congress-JD(S) teloktep ajanga opposition lennirtem longjemdaktsüogo aser 2019 Lok Sabha elections asoshi BJP-i aniba Centre den tokteptsü tashi sayuogo ta Bodbarnü Karnataka chief minister H D Kumaraswamy-i ashi.
“Linük kübok tesem balala nungi lennirtem arubaji onok ka dang ta sayutsü atema liasü aser 2019 küm linük nung yimten tensa tulu ka melenshitsü. Parnoki iba (Karnataka) sorkar kümzüktsü atema aruba masü, iba sorkar ya local Congress aser onok (JD-S) lennirtemi kümzüktsü” ta Kumaraswamy-i osangbener dang ashi.
Külen, BJP-i Congress-JD(S) teloktep dang ‘maongka aginüba teloktep’ ta tenüng jaloktsü aser Kumaraswamy-i tezüngzüktep agiba sentong nung adenba opposition lennirtemji ‘ochimashi benjungtepertem’ ta sangoktsü.
Prime Minister Narendra Modi-i Karnataka assembly election nung BJP atema kanga meranga nüboyimtsü aser tanü pai Twitter ajanga Kumaraswamy-i chief minister inyaktsü tezüngzüktep agiba atema tenüngsang agütsü.
“Karnataka nung H D Kumaraswamy-i chief minister aser Dr G Parameshwara-i deputy chief minister inyaktsü tezüngzüktep agiba atema ni tena nem tenüngsang agütsür. Tenati inyaka aotsü kümsük atema moatsür” ta Modi-i ashi.
Tanü JD-S lennir Kumaraswamy-i Karnataka nung chief minister inyaktsü atema aser state Congress tir & Dalit lennir G Parameshwara-i deputy chief minister inyaktsü atema tezüngzüktep agia liasü.
Tanü sentong nung tongtipang mapang kaji lennirtemi telok noksa ka agiba liasü aser iba mapang party balala nungi lennirtemi teka amteper noksa tangok. Iba ajanga sangküm election nung BJP anema teloktep kati NDA sorkar den tokteptsü akok ta sayur.
Sentong nung Congress tir Rahul Gandhi, tetsü aser UPA chairperson Sonia Gandhi, JD(S) tenzüksang H D Deve Gowda, West Bengal chief minister Mamata Banerjee, N Chandrababu Naidu, Arvind Kejriwal aser Pinarayi Vijayan den Andhra Pradesh, Delhi aser Kerala nungi CPI-M lennirtem aden.
Uttar Pradesh by-election nung loktepba BSP tanishir Mayawati aser SP tanishir Akhilesh Yadav na anasatepa amen aser CPI(M) general secretary Sitaram Yechury, RJD lennir Tejashwi Yadav aser NCP tanishir Sharad Pawar nungertem aden.
Arishi küm 58 tain Kumaraswamy-i osangbener den jembidang, pa ya tensa agi chief minister inyaktsüsa aküm ta ashi aser par teloktep sorkari tayongzükba aika ajurutsü ta shisem.
Ajisüaka, Congress aser JD(S)-i Karnataka aser nübortem ajungkettsü atema külemi inyaktsü, ta paisa metetdaktsü.
“Iba teloktep sorkar yagi party ka sorkar dang nungi tajungba inyaktsü aser onoki public atema temulung agüja inyaktsü. Onoki state tajungba kümdaktsütsü atema inyaktsü lemtetogo” ta Karnataka Chief minister-isa shisem.
Tanü BJP-ibo tezüngzüktep agiba sentong nung maden aser state tesem balala nung teloktep sorkar tasen anema “black day” ta ser amung.
Taruba election tem nung Opposition party temi PM Modi den tokteptsü atema pungmang pungmangang saka parnoki Narendra Modi aser par sorkar manendaktsütettsü, ta BJP lennir tejen aser Union minister Ravi Shankar Prasad-i tanü ashi.
Tanü sentong magidang N Chandrababu Naidu aser Mamata Banerjee nati regional party ajak sabang ka nung longjemtsü tayongzükba agütsü.
“Linük aser nübortem renlokdaktsüba den, regional party ajak den osang agiteptsü federalism tashi itdaktsütsü atema onoki regional party ajak den tongteprateptsü” ta Mamata-i ashi.
Kechiba BJP aser NDA anema raratsü atema non-BJP party aika longjemer ta osangbener asüngdangdang Naidu-i “Onoki regional party tem ajungketnür. Onoki regional party tem tashi itdaktsünür. Ibaji Mamata aser ozü teloker alizüng lir aser yamaji inyaker” ta langzü.