Head Hunters telok 22 buba Classic Cup semi-i iogo

Head Hunters aser Elite Football Club asyartemi Kohima nung tasayadak 22 buba Classic Cup football asayamong 2 buba quarterfinal asaya nung shilem agiba noksa nung angur. (Kohima, November 23)

Kohima, November 23 (TYO): Head Hunters teloki par quarterfinal asaya koka, tang tasayadak 22 buba Classic Cup football asayamong semifinal asayatsü jenjang tanü, Bodbar nü ajangzükogo.
Hunters teloki goal 2-1 agi Elite Football Club (FC) telok madak takok ngua, jenjang tajungji ajangzük.
Tanü asaya tenzüker minute 7 buba nung Alaomei Panmei-i 1 buba goal agüja, par Elite telok temaba jenjang nung ajungkettsü.
Ajisüaka, asaya mezüngbuba shilem tembangtsü mapang nung Hunters asayar, Chumbenthung Kikon-i Y.Khekiho Chisho-i yanglutsüba pass ball agizüka, goal-ji meyiptsüba ajanga par telok anaprongla kasa jenjang aküm.
Tesülen, asaya tanabuba shilem nung, asaya tenzüker minute 63 buba nung Tia Yanger-i renemtsüba pass ball agizüka, Ihoto Zhimomi-i 2 buba aser takokba goal agüja, par Hunters telok nem takok ngudaktsü.
Tanü takok anguba sülen Hunters teloki defending champions, Barak Football Club telok den 1 buba semifinal tan November ita 26 nikongtsütsü 2:00 ako nungi tenzüka asayatsü lemzükogo.
Ano külen, Naga Football Club aser M T Youth Club Football Club telok nati tan Brehostibar nikongtsütsü 2:00 ako nungi tenzüka, tan asayamong 3 buba quarterfinal asayatsü renema lir.