Health minister Nadda ananü atema Imphal nung arua lir

Imphal, February 05 (Agencies) : 2016 Union Minister of Health & Family Welfare JP Nadda tanü Hokolbar nikongdang Imphal tonga arua lir. Pa Imphal nung ananü amungtsü aser iba mapang Honibarnü akatsü aliba, National AIDS Control Organization (NACO)-i North-East State 8 prong atema ayongba sentong nunga adentsü.
City Convention Centre, Imphal nung Honibarnü akatsü aliba sentong nung North-East nungi Health Minister tem ajak adentsü.
Nadda-i Lamphelpat, Imphal nung aliba Regional Institute of Medical Sciences (RIMS)-a semdangtsü aser indangji institute nung tang rongdak nüngdaktem aser ministry-i teyari agütsübatem timi amshi mamshi metettsü merangtsü.
Pa Imphal tonga arudang Manipur BJP teloki Keishampat, Imphal nung aliba parnok office nung pela agizük.
Pai, “Centre-i mapang talangka North-East nung terenlok mapa meinyakteti aruogo ajisüaka tangbo temulung kanga agüja inyaktsü meranger,” ta ashi.
Centre nung NDA-i aniba sorkar-i state tem asoshi lemzüktsüba ‘Central Sponsored Schemes’ tem koma amshir-ar ibaji kanga junga mitdar, ta paisa ashi.
Pai, “Manipur yimten yimsüsüba tsütsü BJP-i temelenshi adokdaktsütsü,” ta shisem.
Iba senden nung CPI lenir tejen aser Manipur nung Cabinet Minister Ningthoujam Mangi Singh den tawa ang state Municipal aser Nagar Panchayat election nung shimtetba lenir parnok pezü tashi Nadda lia BJP telok nung züngsem aküm.