Health Ministry-i Nipah virus atema metetdaktsür

New Delhi, Monupii (May) 22 (Agencies): Kerala nung Nipah virus ajanga nisungtem asüba sülen Centre-i medical team ka bushisüngdang asütsü atema yok aser parnoki ashiba agi iba ya tesem ka nung dang adokba lir aser menatepa maotsü.
Social media nung olulu osangtem prokba nung mamangtsüla ta health ministry-i Mongulbar nikongtsütsü metetdaktsü.
National Centre for Disease Control (NCDC) nungi multi-disciplinary central team-i Kerala kübok Perambra nung Nipah virus ajanga mezüng nisung asüba ki semdang. Iba kibongi tzü taa ajemba tzübo ka nung lah aika aliba angu.
“Lah kar puogo aser lab examination atema bener yokogo. Iba tesem nungi samples balala 60 tashi bendenogo aser tendanga reprangtsü atema yokogo” ta Health ministry-isa metetdaktsü.
Nipah virus mesüra NiV infection ta ajaba yagi shiruru aser nisungtem dak tashidak adokdaktsür. Iba virus ya süngjang achiba lah ajanga kanga belenshir aser iba tashidak agi shirangertemi tango sashiba nung timtem ajurur, tekolok awaker, temang metaa shirang aiter, mangmanger aser tekolok meshitaki akümer.
Tashidak atongba sülen ghonda 48 tsüngda nisung ka süchia aotsü akok aser virus ji menateper. Nipah virus atema mozü ano mongutet lir aser iba tashidak agi shirangertem anepalutsübaji intensive supportive care lir, ta World Health Organisation-i ashir.
Kerala nung tashidak adokba ajanga nisung 10 tashi süogo aser Kozhikode nung nisung 9 anepaludar aser mozü ki aika nung isolation wards lapokogo.
Kerala nung Nipah virus bushisüngdangtsü atema central team nung- Dr Sujeet K Singh, Director, NCDC; Dr S K Jain, Head of Epidemiology, NCDC; Dr P Ravindran, Director, Emergency Medical Relief (EMR); Dr Naveen Gupta, Head of Zoonosis at NCDC; Dr Ashutosh Biswas, Professor of Internal Medicine at AIIMS; aser Dr Deepak Bhattacharya, Pulmonologist, Safdarjung Hospital nungertem lir.