Health Ministry-i state tem dang lokti adenshiba nokdangtsü mepishir

New Delhi, Metsüremi/March 06 (Agencies): Ministry of Health & Family Welfare-i states aser Union Territories dang novel coronavirus tashidak prokba nokdangtsü atema lokti adenshiba nokdangtsü mepishia metetdaktsogo.
State temi asüngdangba ka langzüa Health Ministry-i, “Alima nung mongintemi COVID-19 novel coronavirus tashidak prokba nokdangtsü atema lokti adenshiba nokdangtsü metetdaktsüogo. Iba dak sendakba nung lokti adenshiba nokdangtsüla mesüra iba tashidak mesüngjem tashi sentong agitsü aliba anogo atsülanga atatsüla,” ta metetdaktsü.
Ministry-isa, lokti adenshiba sentongtem ayongzüka lira, COVID-19 densema Severe Acute Respiratory Illness (SARI) aser Influenza like illness (ILIs) nokdangtsü atema state temi ‘risk communication material’ nung shia aliba tekümdangtsü mera agia inyaktsüla,” ta metetdaktsü.
Tang tashi nung India nung nisung 31 dak iba tashidak putetogo aser parnok rongnung Italy nungera densema lir.
COVID-19 tashidak ya mezüng yaküm December ita tatemlen China kübok Wuhan yimti nung pokteta liasü aser tangbo Italy, Iran aser South Korea densema linük 60 tashi nung iba tashidak putetogo.