Health official tem yimdaklirtemi amak

Silchar, June 8 (Agencies): Bodhbarnü Hailakandi district kübok Lala tesem nung aliba upper primary school nung doctor ka densema health ketdangser ana yimdallirtemi amak. Health ketdangser asem ya Rashtriya Bal Swasthya Karyakram (RBSK) sentong kübok kaketshirtem temang tendangtsü asoshi Lala block nung aliba Bishnupur Umananda ME School anepdang 11:00 ako nung semdang.
Anogo ishika tejakdang Social media balala nung vaccine agütsüba ajanga tanur mesotettsü akok ta olulu prokshia liasü. Parnok asem school-i aiding tanurtem ajak jena oadok. Iba sülen yimdaklirtem-i iba osang angashir school-i aritepa arua health ketdangser asem dak azük tenzük. Ketdangsertem ya; SN Singh (doctor), Rekibuddin Ahmed (health worker) aser Padma Rani Singha (auxiliary nurse midwife) nunger liasü aser par asemprongla yimdaklirtemi amakdang yiru.
Parnok asem iba lendong atalokba tesem anasa aliba Lala Government Hospital-i anir ao. Idakji temang anepaluba sülen parnok asem Hailakandi SK Roy Civil Hospital-i belener ao. Iba dak sendakba nung Subdivisional medical officer Amalendu Das-i Lala police station nung ken o ka benokogo. Police-i tang tashi nung nisung na pua lir.