Heart of Asia mungdang nung kiralongrar anema raratsü lemtet

New Delhi/Amritsar, December 04 (Agencies): Punjab kübok Amritsar yimti nung 6buba Heart of Asia (HoA) Conference nung, South Asia region nung amokmeren tulutibaji kiralongra lir, ta lemtetba den külemi Pakistan nung amenoka aliba kiralongrar teloktem tenüng tetogo.
Iba senden nung India aser Afghanistan napronglai Pakistan-i kiralongrartem senotsü agi yariba aser jenokdaktsüba atema aitsü. Senden nung Pakistan Foreign Affairs Advisor, Sartaj Aziz-a liasü.
Heart of Asia Conference ya, küm aika rara ajanga teraksa tulu aliba linük, Afghanistan tanaben yanglushitsü nükjidong nung akar, aser iba senden nung kiralongra tebilemtsü nunga rangloker jembiogo. Anogo ana senden nung linük 40 shi aden aser iba senden nung kiralongraba samatsütsü atema South Asia aser alima linüktem amalitepa inyaktsü bangjem.
Tanü senden nung jembidang Pakistan tenüng metetshiaka Ato kilonser, Narendra Modi-i, ‘kiralongrartem anema dang masü saka kiralongrar pusemertem, jenokdaktsürtem, training agütsürtem aser senotsü agi yarir linüktem anema-a telemtetba takang yanglur inyaktsü nüngaker,” ta ashi.
Ato kilonseri, “Kiralongrar networks tamakok ngudaktsütsü atema asenoki longjemer inyaktsüla. Yimjung pusemba kija jagi teperi masü. Iba denji külemi mapa-a adentsüla,” ta ashi.
Paisa, “Afghanistan nung kiralongra anema ola madokba aser meinyakba ajanga kiralongrartem dang tasü itshitsü,” ta ashi.
Modi-i alima linüktem danga, azütokshidaktsüba aser tetsübu prokba kiralongra tesentaktep aliba nung tamakok ngudaktsütsü atema longjemer inyaktsü temulungtetba alitsüla, ta ayongzük.
Ano Afghanistan Tir, Ashraf Ghani-ibo Pakistan odiodia aitsü.
Pakistan-i Afghanistan tanaben yanglushitsü atema US sen million 500 agütsütsü nangzükba atema Ghana-i pelaba lemsatep ajisüaka pai, “Wb. Aziz, iba sen ya kiralongra azüoktsü atema amshiba kanga tajungba süla, kechiyong yimjung medenibo sen kwi teyari arudir aruaka ozü nübur nüngdaktem mataloktsü,” ta ashi.
“Yaküm Afghanistan nung nisung timba asü. Iba ya tagizüktetla ka masü. Tang tashi kari (linük kari) kiralongrartem jenokdaktsür,” ta ashi.
Pakistan nung amenoka aliba kiralongrar teloktem tenüng atet
Amritsar declaration ajanga, “Rara tali adokdaktsür kiralongrar teloktemji Taliban, Daesh (Islamic State) aser iba den dena aliba teloktem, Haqqani Network, Al Qaida, Lashkar-e-Taiba, Jaish-e-Muhammed, Tehreek-e-Taliban Pakistan aser tanga linük kiralongrartem lir” ta sangdong.
Kasa sangdong ajanga, tekaraba nung Comprehensive Convention on International Terrorism draft renemtsü Regional Counter-Terrorism Framework draft (tawa Afghanistani renemba draft) nung o lemteptsü atema mongintem senden amentsü lemtet.
Taruba Heart of Asia-Istanbul Process Ministrerial Conference ji 2017 küm Republic of Azerbaijan nung alitsü.