Heavyweight Boxer Deontay Wilder-i ganja bena lia apu

Alabama, June 17, 2017 (Agencies): Brihostibarnü Heavyweight boxing champion, Deontay Wilder ket nung ganja bena aliba atema Tuscaloosa police-i pa puogo, ta osang ka ajanga metetdaktsü.
Bodhbarnü Wilder indang gari kichiba ozüng alema tanak asüba agi police-i gariji sot, iba mapang nungji police ketdangsertemi pa meyong Cadillac Escalade gari nungji ganja menemtet, ta police-i ashi.
“Ketdangsertemi gari telung nung alibatem bushitsü atema o ajanga temelaba meshi, iba sülen gari telung nungji ganja tera angu,” ta Tuscaloosa Police Department-i sangdong ka nung metetdaktsü.
America nunger arishi küm 31 tain, Wilder-i taküm February ita nung Gerald Washington den tsüngtepa pongububa round nung knockout agi takok ngua maneni pa indang WBC heavyweight title ngua liasü.
Pa ket nung ganja aliba atema police-i pa apuba sülen pai US sen 1,000 agüja bail nung chiok.
Phone ajanga osangbener den jembidang Wilder atema okatsür, Paul Patterson-i, “Ganja ji Wilder meyong masü. Wilder anogo aika state nung maliasü, pa Rolls Royce gari nung Georgia nungi kidangi meyipa aruba sülen nüngdak kar atema pai Cadillac Escalade melena amshi,” ta ashi.
Wilder meyong gari aika lir, aser itemji par medemertemia amshir, ta Patterson-isa ashi.
“Wilder-ia ganjaji pa meyong masü, anungji pa tenüng tajung meraksatsü atema pai inyaktsü ta shiogo,” ta Patterson-isa ashi.
“Temesepba mozü balala amshiba ken o nung pa nem kodanga tai metongloktsüdang. Pai iba ya süoki ia agir. Nüburtem atema paji tatishitsü tajung agir ka ta pai bilemer. Pa bendanglen alidang shibai pa indang gari amshiar ibaji onoki bushisüngdangdar,” ta paisa metetdaktsü.