Heena Sidhu-i Asian Air Gun Championship gold agizükogo

India tsür Heena Sindhu aser Shweta Sharma nati 8 buba Asian Air Gun Championships tetsür 10m Air Pistol tetoktepba indang gold aser silver agizükba noksa nung angur. (New Delhi, September 30)

New Delhi, September 30 (Agencies): India’er tetsür prangpong toktepa kashishir, Heena Sidhu-i 8 buba Asian Air Gun Championships tatembangbuba anogo nung, tanü Bodbar nü gold agizüka India nem konang bener arutsüogo.
Heena-i tetsür 10m air pistol shilem nung mezüngbuba jenjang ngua gold agizük aser külem sensotsür, Shweta Singh-i kasa shilem nung tanabuba jenjang ngua silver agizüka liasü.
Ajisüaka, Korea tsür, Seon A Kim-i Yashaswini Deswal den temaba jenjang ngua tasembuba jenjang anguba yong India tsürtemi iba shilem nung bronze medal-bo magizükteti süidaktsü.
Taoba world champion, Heena-i tanü points 197.8 ngua gold, Shweta-i points 197.0 ngua silver aser Kim-i points 175.8 ngua bronze agizüka liasü.
Tanü medal agizükbaji densema India-i gold 6, silver 5 aser bronze 6 densema ajak agi medal 17 tashi agizüka tan asayamong nung medal timba agizüker aküm.
Gold 6 aser silver 5 densema ajak agi medal 12 tashi agizüka Iran-i tanabuba aser gold 1, silver 2 aser bronze 2 densema ajak agi medal 5 tashi agizüka Taipei-i tasembuba jenjang angu.
Taruba 2016 küm asayatsü ayongba Rio Olympics nung shilem agitsü jenjang angutsü asoshi qualifying asayamong tatembangba, Asian Shooting Championship Kuwait nung taküm November ita asayatsü ayonga lir.