Hefner-i Playboy Mansion sen million 100 yong yokogo

Los Angeles, August 17 (Agencies): Media mongin, Hugh Hefner-i par Playboy Mansion ki dollar sen million 100 yong kidangsüa alir, Daren Metropoulos dang ayokba osang angazükogo.
Hefner-i par ki dollar sen million 200 yong ayoktsü asoshi osang sangoktsü saka tatem nung par ki sen million 100 yong ayok.
Arishi küm 90 tain Hefner taküm ali tashi Playboy Mansion nung alitsü asoshi kibur tasenba, Metropoulos-i melaba osang ka Entertainment Tonight osangia metetdaktsüogo.
“Playboy Mansion ya alima ajunga nung nungtugu ki ka lir. Hefner-i küm 45 tejaklen nungi tenzüka iba ki kanga nungtugu kümdaktsüogo. Iba ki ya tongti senmang ka dang masü saka kiji 20 buba aso tetenzüklen Los Angeles yimti yangertsüsa tongti shilem agir kiojen yanglur kati purateta yanglutsüba tebur tajung ki ka lir,” ta Metropoulos-ia metetdaktsü.
Billionaire, C Dean Metropoulos’er jabaso, arishi küm 33 tain Metropoulos-i Playboy Mansion kidangsüa aliba ki dollar sen million 18 agi 2009 küm alizük aser tan Playboy Mansion kia sen million 100 agi alizüker lir.
“Playboy Mansion ama nungtugu ki alizüktsü maongka anguba atema kanga pelar. Ni tang talidak ki aser Playboy Mansion ki ka küma yanglushiba sülen kasaji ni talidak kümdaktsütsü mangdang lir,” ta Metropoulos-i shisem.
Yi ayudak, film reprangdak, saisapong asayadak, tennis aser basketball court aser tzü awak densema, Playboy Mansion nung takdang 22 tashi aliba den külemi, Playboy magazine office atema ki shilem balaka tenteta lir.
Alimang square-foot 21,987 nung yangluba Gothic-Tudor kisüyim ki ya ali acre 5.3 nung amenoka lir aser iba ki ya kisür, Arthur R Kelly-i 1927 küm puratettsü.
Hefner aser kinüngtsü, arishi küm 30 tain Crystal Harris na Playboy Mansion den kidangsüa aliba Los Angeles Mansion nung tang telidak lir.