Hema Malini-i Mathura nung ‘public toilets’ sentong lapoktsü

Mathura, January 16 (Agencies): Bharatiya Janata Party MP aser actor Hema Malini-i linük nung aliba tetsürtem dang metsü meshidak ki yanglutsü ajungshi kechiba süra iba ya temang anema aliyim asoshi rongdak nungdak tulutiba rongnung ka lir, ta Honibarnü ashi.
Rawal yimtak Sulabh International-i mezüng yanglutsüba metsü meshidak tesem  lapoktsüdang lai, 2019 küm tashi nungbo lar constituency nung metsü meshidak tesem noklang nung noklang yanglutsü nükjidong lir, ta ashi.
Sulabh International-i Rawal yimtsüng nung metsü meshidak tesem 50 tashi yanglutsütsü nangzükogo.
“Metsü meshidak tesem nüngdakba angatetdaktsütsü mechi nung onoki Lord Krishna asoba tesem, Mathura shimtet,” ta Sulabh ngutetsang Bindeshwar Pathak-i ashi.
Tang tagidang, ‘Clean India Campaign’ inyakyim tushia ashiba mapang Malini-ia akokba tashi nung yariteptsü shiogo.
“Onoki loktiliba terenlok asoshi bendanga agüja inyaker aser iba mapa ya sensakertem asoshi temeim mapa sayuba mesüka lir, ta lai ashi.
Pathak-i yimtak alirtem dang metsü meshidak tesem amshitsü aser merüka ayutsü nüngdak, ta kanga nenshia shia liasü.
Iba yimtsüng nung moapu nung jana aoba yimya khen yongi meshi meshia samadaktsütsü asoshi mera ajak agitsü aser 2019 tashi nung iba yimya samadaktsütsü asoshi Non-Resident Indians (NRIs) nisung crore ana dang metsü meshidak tesem yanglutsü asoshi sen tenlatsü ajungshia metetdaktsüogo.
Ato Kilonser, Narendra Modi indang nükjidong atongtsü atema 2019 tashi nung metsü meshidak tesem crore 12 shi yanglutsü nüngdaker.
“Iba ya mapa kanga tulu lir, ajisüaka asenok lungjemerbo akoktsü aser bendanglen alir India nungertemi iba maparen nung shilem tuluba agitettsü. Iba ya NRI tem asoshi parnoki linük meimba sayutsü maongka balaka lir,” ta Pathak-i ashi.
Bendanglen alir India nunger NRI tem crore ana shi lir aser parnok nisung shiai küm asem tsüngda nung metsü meshidak tesem trokrok yanglutsü nungbo nükjidong mela mela atongtsü. Metsü meshidak tesem ka yangluba nung sen dollar 500 shi aotsü anungji trok nung sen dollar 3000 mesüra India sen lakh ana aotsü, ta Pathak-i ashi.

You must be logged in to post a comment Login