Henin o Safin na International Tennis Hall of Fame nung dendaktsütsü

New York, March 09 (Agencies): Tesüiba tetsür tennis World No. 1, Belgium tsür, Justine Henin aser tesüiba tebur World No. 1, Russia nunger Marat Safin na International Tennis Hall of Fame nung dendaktsütsü renemba osang ka ketdangsertemi metetdaktsüogo.
Henin-i taoba mapang Grand Slam singles takok marok 7 tashi agizükba den külemi, WTA rankings nung hopta 117 tashi temaba jenjang atonga abenba aser Safin-i tongti tennis takok marok 2 tashi agizükba den külemi, ATP rankings nung temaba jenjang hopta 9 tashi atongba abenba osang bushiteta lir.
Tena den külemi, asür tennis asayar 2 – France nunger Yvon Petra aser Britain tsür, Margaret Scriven nata International Tennis Hall of Fame nung dendaktsütsü renemba osang jangjaogo.
Petra arishi küm 68 tain lia 1984 küm asü aser Scriven arishi küm 88 tain lia 2001 küm asü.
Taküm July ita 16 nü sentong tajung ka agia, par pezü nem iba naroküm tulu ya agütsütsü renemogo.
2011 küm tennis asayatsüren toktsüla, arishi küm 33 tain Henin ya Belgium asayar rong nung Hall of Fame nung adentsü jenjang angur mezüngbuba asayar akümer lir.
Lai 2004 Australian Open, 2003 & 2007 US Open aser 2003, 2005, 2006 & 2007 French Open densema, singles takok marok 43 tashi agizükba osang bushitetogo.
2009 küm tennis asayatsüren toktsüba jakdang 2000 US Open aser 2005 Australian Open takok marok densema, tebur singles takok marok 15 tashi agizüksang, arishi küm 36 tain Safin-a par Russia asayar rong nung Hall of Fame nung adentsü jenjang angur mezüngbuba asayar akümba osang jangjaogo.