Hepatitis C anepalutsü kanga dalang kümogo: HepCon

Kohima, November 9 (TYO): Hepatitis C Virus (HCV) anepaluba kanga dalang kümogo aser tesüiba mapang ita trok nung sen lakh 4-5 endoka aliba, tangbo ita nung sen 5000 dang endoker.
Tanü nikongdang Hotel Japfü, Kohima nung HBV aser HCV indang senden ka amendang Hepatitis Coalition of Nagaland (HepCon) Secretary, Ketholelie Angami-i iba osang metetdaktsü.
WHO-i hepatitis dang ‘viral time bomb’ ta jatettsüogo aser tanü iba tashidak ya Injecting Drug Users dak dang atonger masü saka virus ajanga tangartem dak-a shirang adokdaktsür, ta Ketholelie-isa shisem.
Nagaland nung alirtemi Hep C atema tebilemtsü bena liasü aser iba ya public health tebilemtsü ka kümogo. Hep C ya taneptsü anguba tashidak ka lir aser ita 6 nungi küm 1 tashi nung taneptsü nguteter. Ajisüaka, osang tejangja memetetba aser sen aika endoka anepaluba ajanga nisung aika nokdangtetba tashidaktem agi shiranga asür, ta paisa metetdaktsü.
HCV aser HBV khuret atema mapa inyaktsü nüngdak ta ajiteta iba sentong ya Nagaland Users Network (NUN), HepCon aser Access for Rights of Knowledge (ARK) tem yaritepa ayongzüker. Iba asoshi sorkar nungi teyari kecha mali, ta Ketholelie-isa ashi.
Hopta ana tsüngda one-stop facility centre ka lapoktsü aser Family Planning Association of India (FPAI), Nagaland branch, Daklane nung angati tendangtsü aser Kohima Diagnostic Centre, Lerie nung sen 1800 agi tendangtsü akok, ta paisa metetdaktsü.
Taoba mapang Kohima nung aliba pharmacists nung mozü maliasü aser iba jagi hepatitis agi shirangertem Guwahati aser Imphal nungiang mozütem bener aru. Ajisüaka, tangbo FPAI Reproductive Health & Family Planning Clinic (RHFPC), Daklane nung mozütem angutsü, ta paisa shisem.
Sentong nung Bethel Medical Centre, Dr. K. Asa Savino-ia HCV anepaluyim indang osang metetdaktsüdang, nisung million 170 dak HCV agi atonger aser küm 20 sülen iba tashidak atonger noklang nung shilem 20 dak viral hepatitis nngi cirrhosis akümer, ta ashi.