Herat nung bomb apok, nisung 10 asü

Kabul, June 06 (Agencies): Afghanistan nung aliba Herat province nung bomb ka apokba mapang nisung 10 asü aser aika yiru, ta police ketdangsertemi osangbener dang ashi.
Iba bomb ya rickshaw ka nung inoktsü aser Jama Masjid anasa Mongulbarnü pokdaktsü, ta police odongtar, Abdul Ahid Wali Zada-i ashi. Jama Masjid ya Muslim nunger indang tekülem ki tulu ka lir aser iba tekülem ki ya century 12 nung yangluba lir.
“Iba lendong ajanga nisung taküm samaba ya anu alitsü südi,” ta Wali Zada-isa shisem.
Iba osang züluba mapang tashi nung lendong agütsüba tenüng agir telok kata maliasü. Iba lendong ya ozü telokibo magütsü, ta Taliban telok indang odongtar, Zabihullah Mujahid-i osangbener dang ashi.
Iba lendong indang noksatem social media balala nung inokja aliba nung Jama Masjid alema mokozü tanak adoka angur.
Afghanistan yimtiba Kabul nung tawa lendong aika adalokba sülen yimjung ken o jembitsü asoshi Afghan tir, Ashraf Ghabi-i senden ka ayongzüka aliba mapang iba lendong adalok.
Kabul yimti nung aliba foreign embassy tem anasa May 31 nung truck sünga bomb inoker pokdaktsüba mapang nisung 150 dak tali pokset.