Hero Intercontinental Cup final India aser Kenya na asayatsü

Mumbai, Aami (June) 9 (Agencies): Intercontinental Cup final asaya nung India aser Kenya na asayatsü. Four-nation football tournament tatembuba league asaya nung Kenya-i 4-0 agi Chinese Taipei koka final tongtetogo.
Rogonü asaya tembangba sülen Kenya, India aser New Zealand nunger ajak point trokrok nung league tembang aser goal-difference nung New Zealand pur tsük.
Kenya nunger goal difference nung Amungnü final nung asayatsü asoshi jenjang ngutetogo. Parnok plus two liasü aser New Zealand plus one liasü. India team goal difference plus seven lir.
India team-i Kenya 3-0 aser Chinese Taipei 5-0 agi akokba sülen New Zealand den 1-2 agi makok.
Chinese Taipei nunger anaben tashi atonga tamakok anguba sülen asayamung nungi tuguadoker liasü. Iba asayamung nung parnoki dang goal ka danga magütsütet.
Chinese Taipei aser Kenya na asaya nung minute 52buba nung Joackins Atudo-i mezüngbuba goal idaktsü aser iba sülen minute 3 or penalty ka ajanga pai par telok atema tanabuba goal idaktsü.
Substitute Timothy Otieno-i Kenya nunger atema tasembuba goal minute 69 buba nung idaktsü aser Atudo-i minute 88buba nung goal ka agüja goal 4-0 nung asaya tembang.