Hero MotoCorp-i Xtreme 160R sayaogo

Jaipur, Tsüklai/February 18, 2020 (Agencies): India nung two-wheeler yangluba company tulutiba Hero MotoCorp-i Mongolbarnü taruba küm 5 nungi 7 atema research aser development den manufacturing facility balala amenoktsü asoshi densema maparen balala sendakba nung sen cr. 10,000 invest asütsü renemba sangdonga liasü.
Company indang Vision 2020 ya “future of mobility” ka asütsü ta shia, Hero MotoCorp Chairman & Managing Director, Pawan Munjal-i ashiba agi, 2030 tashi nungbo carbon neutral ka asütsü company nükjidong lir.
“Aruya aliba küm pungo nungi tenet tashi alternative mobility solutions, state-of-the-art, sustainable manufacturing facilities, network atsülangshiba indang research & development nung aser alima ajunga nung iba brand takok ngua ayoktsü asoshi onoki sen cr. 10,000 jungnüa invest asütsü,” ta Munjal-i ashi.
Munjal-i ashiba agi, Japan indang Honda company den pilaba sülen 2011 küm nung company-i tanga teyari magi inyaka aruogo, kasa mapang plants, machineries aser product development atema USD 1 billion aser tanga USD 600 million ya R&D nung inokja liasü.
Munjal-i, 1985 küm iba company tenzük asünung, taküm küm tatemlen tashi company-i ‘cumulative sales’ million 100 ajangtettsü imlar, ta ashi.
Monglbarnü sentong ka nung Hero MotoCorp-i BS-VI compliant versions indang Glamour motorcycle model (sen 68,900 aser sen 72,000) aser Passion Pro (sen 64,990 aser sen 67,190) sayaa liasü.
Kasa mapang company-isa premium bike Xtreme 160R sayaogo aser shishilembadak iba motorcycle ya taruba ita March nungi angutsü.