Herojit nem police tekümzükba agütsü

Imphal, Aenjeti 22 (Agencies): Asian Human Rights Commission (AHRC) puri recommend asüba sülen Manipur Police-i Thounoujam Herojit Singh nem personal security guard ana agütsüogo. Herojit-i ya police nung head constable aliba mapa nungi anentsür lir aser pai 2016 küm 2003 nungi 2009 tsüngda nung taila khatepba aika ajangshia aruogo ta sangdonga liasü.
Herojit-i iba ita tetenzüklen supreme Court nem agütsüba affidavit nung ashiba agi, pai ketdangsertem tetuyuba nung 2009 küm taoba mapang telungpur Chungkham Sanjit khasetba metetdaktsüba sülen pa tepsettsü asoshi merangogo. Iba kasa tatalokba nung mashisa aliba tetsür ka tenüng agi, Thokchom Rabina dena state yimtiba Bir Tikendrajit lenmang nung khaset, aser iba yagi police anema state ajunga nung longkak aita liasü.
Iba affidavit agütsüba sülen AHRC-i Manipur director general of police L.M. Khaute dangi shidi ka yok. Iba shiti nung Herojit-i osang kanga dang tongtibang jungkai adoka metetdaktsüogo anungji pa nem tekümzükba agütsütsü nüngdaker, ta AHRC-i züluja liasü.
Head constable aser constable kati, Herojit nem tekümzükba agütsütsü, ta ketdangser sangdong ka ajanga metetdaktsü.
Herojit dang “vulnerable whistleblower,” ta jaa Human Rights Alert (HRA) executive director Babloo Loitongbam-i state police-i mapang shidak nung maparen ajak inyakba atema parnok tenüng asang. “Herojit ya kanga dang lendong nung lir aser pa lenmang aisü nungi tepsettsü asoshi merangtsü akok. State police-i pa nem mapang shidak nung tekümzükba agütsüba atema onoki police tenüng asanger,” ta Babloo-i ashi.