Hewoto Awomi aser Pukhavi Yepthomi na NPF nung aniok

SM College auditorium hall nung NPF party  züngsemtem den tasen aniokertem külemi agiba noksa angur. (Dimapur, December 10)

Dimapur, December 10 (TYO) : Honibarnü ex-minister Hewoto Awomi aser Dimapur 1 A/C nungi taoba candidate Pukhavi Yepthomi na pela agizükba sentong agi.
S.M. College auditorium hall, Landmark Colony nung ayongzüka agiba sentong nung NPF Dimapur division president, I. Nungsang Jamir-i lennir ana party nung pela agizük.
Tenati NPF party aser Chief minister T.R Zeliang aser NPF president Dr. Shurhozelie Liezietsu na lenisüba tashi itdaktsütsü atema telemtetba agia adener, ta I. Nungsang Jamir-i ashi.
Paisa, lennir ana dang mangatettep alibatem amadoktsü aser party tashi aittsü atema maneni mapa inyaktsü mepishi.
NPF nung adenertemi o jembidang, chief minister TR Zeliang aser NPF president Dr. Shurhozelie Liezietsu nati kanga dang takok ngua len aniba party nung adentsü atema telemtetba agi, ta Pukhavi-i ashi.
Hewoto-ia party züngsemtem tsüngda telongjem alitsü aser party tashitaitba kümdaktsütsü atema ayongzük.
Nagaland nung civic polls agitsü aliba atema olen ka jembidang, tetoktepba nung shilem aginüa bilemba candidate tem nem party ticket magütsüra, parnok melena agütsür yaritsü atema Hewoto-i ayongzük.
“Party manguba atema party nung mepetmesü madokdaktsüi, party-i shimba candidate pusema nungittsüla. Party-i ward ka nung ticket ka dang agütsütettsü ta asenok temulung nung yudi” ta paisa shisem.
Tanü sentong nung Dimapur division atema incharge NPF secretary assistant, Chokhriveyi Venyo, president NPF 1-Dimapur 1 A/C L Anthony aser tangartemi o jembi.
Sentong nung mendenji secretary Dimapur division Mhachio Lotha liasü, president women wing Dimapur division Vepranulu Nyekha-i temoatsü meshia sarasadem, Benjongsola Jamir-i ken ka aten aser vice president Dimapur division H. Thong-i anküp tepela o jembi.