Hezbollah mitkar lenisang, Mustafa asüba osang sangoktsüogo

Beirut, May 13 (Agencies): Lebanon nung tentetba telungpur telok, Hezbollah nung mitkar lenisang, Mustafa Badreddine Syria nung asüba osang ka par teloki tanü, Hokolbar nü metetdaktsüogo.
“Ozü lenir, Mustafa Syria yimtiba, Damascus tayimtsü anendak anasa pokshiba lendong ka nung pokset saka iba lendongji shir teloki atalokdaktsü iba osang tang tashi mejangjateti bushisüngdang tenzüka lir,” ta Hezbollah teloki ashi.
Mustafa asüba ajanga Syria Tir, Bashar al-Assad-i aniba Syria sorkari takoksa tulu angur lir kechiyong Hezbollah telok ya Syria sorkar nungiba tongti telok ka lir.
US aser Russia nati aroki ayonger külen Syria sorkar aser sorkar anemertemi meraratsü tezüngzüktep agir anogo 6 süir külen Syria sorkar telok pusema nungitsang, Mustafa asüba osang ya angazüker lir.
Par telok ana tsüngda agiba tezüngzüktep yashi, Brehostibar anepdang tembangba sülen Syria sorkar anemertemi tetsür ka densema, nübur 2 tashi Syria sorkari agia aliba Aleppo yimti tesem nung injang agi kasetba osanga jangjaogo.
Syria sorkar mitkartemia Al-Qaeda telok den sentaktepba Al-Nusra Front teloki Idlib province nung tentetba tesep amakba sülen Al-Nusra Front telungpur 16 tashi tepsetba osang ka Syria sorkar mitkar lenirtemia metetdaktsüogo.
2005 küm Lebanon Ato Kilonser, Rafiq Hariri injang agi kasettsü merangba maparen nunga Hezbollah telok tentetba mapang nungi tenzüka tongpang raratsü shilem nung tongti shilem agisang, Mustafa-i tongti shilem agi ta pa dak temulung melemi küma, US aser Israel nati aputsü asoshi tongtipangsüa bushir ozüng alema inyaker rong nung Mustafa-a densemba osang jangjaogo.
Mustafa jakdang Hezbollah mitkar lenisang menden abensang, Mustafa teko, Imad Mughniyeh-ia 2008 küm Damascus nungsa tepset aser pa tepsetba atema Hezbollah teloki Israel kanga sashia aija liasü.
Ajisüaka, tan Mustafa tepsetba atemabo Hezbollah teloki Israel tanü tashi aija mali.
Iran den amalitepa, Assad-i aniba Syria sorkar pusema nungiter rong nung tongti lenir ka ta züngoka, US-i 2012 küm renemba kiralongrar tetsüti tarensen nung Mustafa tenünga inoksema liasü.