Hezbollah telok kiralongrar ta züngoker: GCC

Riyadh, March 02 (Agencies): Lebanon nung tentetba telungpur telok, Hezbollah kiralongrar telok ta züngoktsü telemtetba ka Gulf Cooperation Council (GCC) nung züngsemba linük 6-i agiba osang ka tanü, Bodbar nü alima dang sangoktsüogo.

“Hezbollah teloki GCC linüktem nungi nüburtem mesüzüka par telok nung anioksemba, ozüng alema tongpang nung amshisü osettsüset shibelenba aser lendongtsüdong atalokdakja tensa mejungi kümdaktsüba maparen nokdangtsü nükjidong nung GCC-i Hezbollah telok kiralongrar ta züngoktsü lemtetogo,” ta GCC Secretary General, Abdullatif al-Zayani-i osang jangjashitsü.

Paisa ashiba agi, Hezbollah teloki Syria, Yemen aser Iraq nunger nung tebang agi mejembitettsüsa ozüng alema maparen inyaker aser ibaji ajanga Arab linüktem nung tensa mejungi kümdaktsür.

GCC nung Saudi Arabia, Kuwait, Qatar, Bahrain, Oman aser United Arab Emirates linüktem züngsema lir.