H&FW department nung ‘backdoor appointments’ agientsü : P. Longon

June 10, 2016 nü Capital Convention Centre, Kohima nung NIDA Annual General Body Meeting nung Health & Family Welfare Minister, P. Longon-i o jembiba noksa nung angur.

Kohima, June 10 (TYO) : Health & Family Welfare Minister, P. Longon-i par department nung ketdangsertemi mebilemdangi nübotem shimokba atema mepelaba ashi aser department tenüng tajung meyipa bener arutsü atema tim masüba inyakyimtem metongshitsü ta metetdaktsü.
Capital Convention Centre, Kohima nung Nagaland In-Service Doctors’ Association (NIDA) pur Annual General Body Meeting nung o jembidang Longon-i ashiba agi, department ketdangsertemi pei lemzükba mapa inyakdang parnok sorkar ama bilema meinyaktsüla.
Department nung ketdangsertemi sorkar nungi temelaba magii aser memetdaktsüi backdoor appointments aika aliba atema P Longon-i iba onük jembi.
“Tanü putu nung tashidak tapu balala aika adoker aser iba jagi nisungtemi doctor ka dang nungi taneptsü angutsü aser taküm melenshitsü dak nungi alia imlar. Mapa ajak rongnung public-i doctor tem dak nungi tuluba imlar anungji NIDA züngsem ajaki Nagaland tesem ajungalen alirtem nendaka yaritsü atema merangtsüla,” ta paisa ayongzük.
“Meta talangka pilar aliba tesemtem nunga timtem melii inyaktsü asoshi state sorkari medical fraternity atema sentong tajungtem atonga inyaktsü meranger. Nai meimchir tenzüktsü atema bendanga agütsütsü mulungtetra, na inyakba tesemji tongtipang masü. Doctor shiai meta talanglang pilar aliba tesemtem nung alirtem asoshi aria bilemtsütsüla, kechiyong parnok küm aika health care services tajung mongudangi arur” ta Longon-isa metetdaktsü.
“Nagaland nung health sector tejakleni odar aser iba atema doctor tem dang kanga pelar. Ajisüaka, asenoki department nung takok aser tamakok angubatem meyipa reprangdangtsüla. Khenkhenbo doctor tem aser sorkar tsüngda mangatettep adoktsü akok saka ibala mapang shirangertem tim metemdaktsütsüla” ta H&FW Minister-isa ayongzük.
Health & Family Welfare department indang tia aser ano sensotem temang anema alitsübaji nenok ket nung dang lir. Anungji doctor tem külemi longjemer Nagaland nung public health care system tajungba kümdaktsütsü atema meranga inyaktsü ayongzüker, ta Longon-isa shisem.
Tanü sentong nung Principal Director H&FW, Dr. L. Watikala Ao-ia Medical Superintendent aser Chief Medical Officer ajak dang mapa tazüng melira nisung shimoktsü atema application magütsütsüla ta tayongzükba agütsü.
District health centres nung ali kiburtemi Grade-IV staff mapa meshiba atema tebilemtsü khuret bena Dr. L. Watikala-i ashiba agi, “ali kibur nem Grade-IV staff mapa ka agütsür saka iba nisungji mapa nungi anisüngzükba sülenbo, tanga mapa magütsür.”
Sorkar mapa inyakertem state adena orr temang anepalutsüsa tia ajurudang doctor temi state government-i shimteta aliba hospital tem dang tuyutsüla kechiyong medical reimbursement nung item mozükitem atema dang agütsür, ta laisa metetdaktsü.
Tanü senden nung NIDA-i 2016-19 kümsük atema President, Dr. Khriezotuo Paphino lenisüba nung ketdangpur tasentem shim.
Iba senden nung Dr Atoshe Sema menden liasü, Dr. Viketuolie Pienyü-i ken ka aten aser Dr Puse Liegise-i anküp tepela o jembi.