HG & CD ajanga GHS Mkg Village nung disaster management trg ka katsü

GHS Mokokchung Village nung disaster management training ka agir külen HG & CD District Commandant Watilemba den Head Master Apongdi, Jawan-tem aser kaketshirtem külemi tangokba noksa nung angur. Mokokchung, March 8, 2019.

Mokokchung, March 8 (TYO): Mokokchung Home Guard & Civil Defence-i ayongzüka Govt. High School Mokokchung Village nung alima lendong tapu balala atalokdang kümzüka aser meteta alitsü indang “disaster management” training ka March 8 nü takok ngua katsüogo. Iba training ya Mokokchung HG&CD, District Commandant, Watilemba lenisüba kübok achayanga agi.
Tanü practical sentong metenzükdang Sub-Inspector & Platoon Commander HG & CD, Maongkaba-i yiruyipongdang bandage nailoktsüyim, tangu sashidaktsütsü atema anepaluyim/tasa (CPR), lendong adokba mapang nisung kümzükba tasa (emergency method of rescue), teret/tezü-tera raksadang sü agi alepba/alenba yimya tapu balala indang rateta ashi. Kaketshirtem telok balala küma lemsar jawan-temi practical dena tekümzükba yimya tapu balala sayua liasü.
Iba training ya kaketshirtemi lendong matalok tsüngda meteta lidaktsütsü aser lendong atalokba mapang timi langzütsü nükjidong yur iba training ya katsüogo aser lendongji kodang ataloktsüar shingaia meshitettsü, anungji, mapang ajak nung asenok renema atatsübaji kanga tongtibang lir, ta Mokokchung HG & CD, District Commandant, Watilembai osangbenertem den jembidang lemsatep.
Kitsük kirong, anentsüh mesüra tzümetsüng lendong tulu atalokba mapang nungdakbapurtemi Emergency Toll Free number (107) nung call sütettsü, iba number ya Nagaland ajak atema ka dang lir. Ano Mokokchung district nunga control room ka lapoka lir aser ibaji (222-5103) ajanga tongtettsü, ta HG & CD, District Commandant-isa ashi.