High Court Bar Association, Nagaland-i lungkak ait

Kohima, February 12 (TYO): Bar Council of India (BCI) kübok High Court Bar Association, Nagaland-ia tanü lungkak aitba nung shilem agi.
HCBAN züngsem 120 shi kati tanü Gauhati High Court Kohima Bench nungi Raj Bhavan tashi jaja aser State Governor nem BCI-i renemba bangzüng ka agütsü.
Nagaland Governor maliba ajanga parnoki Secretary nem tezülubaji agütsü.
Prime Minister Narendra Modi-i March 1, 2014 nü linük nung okatsürtem dang nangzükba ama mapa inyakang ta BCI-i takhangba agütsü.
Gandhinagar nung BCI-i sentong tulu ka ayonga agidang Modi-i tongti tesemdanger ka ama shilem agi. Iba mapang Modi-i Gujarat nung Chief Minister ka ama aden.
Modi-i pa linük nung Prime Minister kümra, lawyers atema budget nung lemzüktsütsü ta nangzük. Ajisüaka, tanü tashi mapa küma meinyaktsüba atema linük ajunga nung lungkak aiter, ta BCI-i metetdaktsü.
High Court Bar Association Nagaland vice president N Mozhui aser joint secretary Joshua Sheqi nati Governor nem agütsüba shidi nung sign asü.