High Court-i Rikumkaba aitsür

Dimapur, November 1 (TYO): July 4, 2013 nü asür Nungshilila (Alila) tepsetba ken o atema Gauhati High Court Kohima Bench-i October 17, 2017 nü obendang aser tetuyuba agütsüba nung tai tonglokja alisang Rikumkaba (Rikum) aitsüogo.
Asür Nungshilila teyii Nagaland State Legal Services Authority tsüngdang Gauhati High Court Kohima Bench nung Dimapur(West) Police Station ajanga tetuyuba ana agüja aliba meyipa agitsü atema temepishiba ken o ka benoktsü asüngdang. Iba nung ajemdaker, India Linük Temzüng Arrla 226 kübok High Court Kohima Bench nung ken o ka benok.
Temepishiba nungji Sessions Judge, Dimapur-i oshidang agütsüba meyipa agitsü aser iba ken o nung tai tonglokja alir asem- T. Yapang Ao, Samarenba aser Santosh Nath nunger medentsütsü aser Rikumkaba medenja aliba agientsü atema shia liasü.
High Court Kohima Bench nungsa iba ken o tanaben CBI nem bushisüngdang südaktsütsü aser tasür kinungertem nem teyari agütsütsü atema temepishiba benoka liasü.
High Court-i telok anaprong tsütsüi ashiba angadangba sülen Sessions Judge Dimapur-i taoba mapang agütsüba tetuyubatem meyipa agir aser Rikumkaba-i asür Nungshilila tepset ta tai tongloktsür ta October 17, 2017 nü obendang agütsü.
High Court-isa Sessions Judge Dimapur dang Rikumkaba ozüng tapet agi merenshitsü atema tetuyuba agütsüogo.
Maneni, Nagaland State Legal Services Authority-i state nung lateta aliba ama tekaratiba ung tasür kinunger nem teyari agütsütsü atema High Court-isa metetdaktsü.