Higher education department-i tesayur 100 shimtsü: Deo Nukhu

Kohima, May 15 (TYO): Nagaland nung aliba sorkar college tem nung tesayur aser associate professor tem peria maliba atema Higher Education Department-i tesayur mapa tasen 100 dak tema adoktsü atema tebilemba ka shidangogo.
Higher & Technical Education Parliamentary Secretary, Deo Nukhu-i ashiba agi, Centre sorkari State indang budget nung higher education sector atema ishiba agia shilem 5 lemzükja lir.
Ajisüaka, Nagaland nung sen lemzüktsübaji State indang budget nung shilem ka ang matonger. Yaküm State Budget nung Higher Education Department nem 0.06% dang lemzüktsü aser iba jagi Department meperir, ta paisa ashi.
College tem nung tesayurtem peria meliaka, senotsü peria manguba ajanga State sorkari tesayur mapa tasen adoktsü memelar. Ajisüaka, department-i subject balala nung tesayurtem mapa tasen adoktsü atema tebilemba shidangogo, ta Deo-isa ashi.
Eastern Nagaland nungi kaketshirtem science azüngtsü atema Department-i Science College ka lapoktsü. Iba college dang Model Degree College (Science) ta ajatsü aser Mon district kübok Wakching nung lapoktsü aser 2018-19 academic session nungi lapoktsü imlar, ta
Taruba hopta pa Punjab-i aotsü aser idakji aliba technical institutes nung Naga kaketshirtem oa azüngtsü atema osangtsüsang metetpelatsü, ta paisa shisem.
Ano külen, department-i backward areas nung bus service magütsür ta ENSCU-i ashiba atema Deo Nukhu-isa ashiba agi, “Department-i college indang bus garitem alitsü atema senotsü agütsüogo saka ‘contingency basis’ nung Driver aser Conductor tem anioktsü tebilemba State Chief Secretary-i magizük. Iba jagi onoki bus gari magütsür.”
Eastern Nagaland nung tesayur kati dang college department balala repranger ta osangkakettem adokbaji tiyazü lir, ta Deo Nukhu-isa ashi.
Ano, küm ka dak tema college tem nung Principal tem mapa melemzüktsübaji senior Ph D aser non-Ph D tesayurtem tsüngda okadak ken o benokba ajanga lir. Ajisüaka, iba onük ya tekaratiba nung bentettsü, ta paisa metetdaktsü.